Colegio Arubano orguyoso cu docente Hooijmaaijers a haya reconocemento

Departamento di Cultura Aruba cu honor

• El a bira docente honra di CKV 

ORANJESTAD (AAN): Durante un ceremonia special durante pauze na Colegio Arubano na Vondellaan, Rector Tim Croes a informa alumnonan presente cu algo special ta bay socede.

   Esey ta ora cu Siegfried Dumfries, kende ta Director di Departamento di Cultura a haci entrega oficialmente di un merecido reconocemento na un docente di e scol, como cu nan ta mire como un docente cu merece tur honor pa su forma di duna les di CKV.

   Ta trata aki di docente Femke Hooijmaaijers, y ora cu a anuncia esaki, su alumnonan cu ta haya les di CKV for di dje mesora a cuminsa duna grito di alegria, acompaña pa abundancia di aplauso.

   Su dedicacion y pasion pa duna les den e materia aki, a bin ta crea un impacto grandi cerca e alumnonan.  Segun Tim Croes di Colegio Arubano, e scol ta hopi orguyoso di Juffrouw Hooijmaaijers, y agradeci pa su contribucion na su desaroyo artistico y cultural.  Su trabao duro y compromiso ta inspirador y hopi aprecia mes.

   Pa e motibo ey, tanto Departamento di Cultura y Rectorado di Colegio Arubano kier a dune sinceramente un felicitacion cu e maraviyoso reconocemento aki.

   Pa esnan cu ainda no sa, e lesnan di CKV nifica “Culturele en Kunstzinnige Vorming”, cu nifica ‘Educacion Cultural y Artistico.  E ta un vak cu na Hulanda y Caribe Hulandes ta worde duna den enseñanza avansa.  Den e lesnan aki, alumnonan ta cera conoci cu tur tipo di disciplina artistico.

   Un les di CKV ta hopi ‘leuk’ pa alumnonan, y e forma mas efectivo ta pa laga e alumnonan mes experiencia arte y cultura di cerca.

    Dumfries di Departamento di Cultura Aruba a declara: “Masha pabien Colegio Arubano y masha danki na maestra Femke Hooijmaaijers. Bon mereci su reconocemento y resaltante di tur esaki ta su trabao impecabel y nos gratitud pa tur aña di aporte na desaroyo di arte y cultura en general y formacion pedagogico den un nivel superior asina halto.”

   E aña aki, Departamento di Cultura a haci entrega di reconocementonan aki den cuadro di e 20 aña di celebracion Nacional di “Dia Mundial di Teatro” y tambe “Premio Nacional di Teatro 2024”.