Captura record di pisca Jurel Yellowfin na costa di Santa Marta na Colombia

Nan tin varios dia sin captura nada

• Un record di pisca a wordo gara den un solo dia 

ORANJESTAD (AAN): Ultimo simannan por a sigui noticia di parti noordoost di Venezuela, na estado Nueva Esparta unda piscadonan ta kehando cerca instancianan, cu casi nan no ta haya pisca mas pa captura den e zona di lama cerca di Isla di Margarita.

   Despues di esey a bin reclamo di hopi piscado Venezolano mas, di e.o. estadonan La Guaira, estado Carabobo, estado Falcon, y estado Zulia cu casi nan no por ni haya sardin mas pa gara den lama.  Lama dilanti costa di Venezuela e lunanan aki ta produci masha poco pisca mes.  Na su lugar por mira monton di Jellyfish den tur sorto di color.

   Ta conoci cu den temporada di Cuaresma, cu e calor inmenso sa core cu pisca for di e area aki, ya cu nan ta bay pa lama mas fresco unda tin mas cuminda na abundancia pa nan.

   Loke a pasa na Colombia: A sali na cla cu no ta djis piscadornan di Venezuela ta keha, sino cu parti Caribense di Colombia tambe a produci reclamo.  Specialmente ultimo dos simannan tin reclamo di piscadornan, specialmente den area panort di ciudad Santa Marta na departamento Magdalena.

   Piscadornan Colombiano ta indicando cu nan tin varios dia ta subi lama sin cu por captura algo drechi. 

   Sinembargo siman pasa un situacion hopi raro a presenta su mes, ora cu piscadornan cu ta subi lama for di tradicional pueblo di piscador Taganga, cu ta keda como 3 kilometer noordoost di Santa Marta.

   Tabata Diaranson 10 di April 2024 cu e piscadornan a bin descubri cu un scol di pisca cu nan ta yama ‘Jurel Yellowfin’ a aglomera cerca di costa, y tambe beachnan di Taganga.

   Tur hende a duna un man pa asina yuda gara e piscanan aki y tira nan riba tera.  Piscanan cu ta di tamaño mediano y toch grandi, y a keda haci esaki cu hopi orguyo.  Diferente hende cu tabata den e area, a tende di esaki y a core yega cerca pa mira cu nan mesun wowo, incluyendo turistanan Colombiano y di exterior cu tabata den e zona.

   Piscadornan a mira esaki como un bendicion di Dios, como cu nan tabatin varios dia cu nan ta regresa bek cas man bashi.  Pero awor cu hopi fe den Todopoderoso, nan a mira con e “bendicion” a yega, segun un di e piscadornan a declara na un reportero.

   Nan a hisa y pone tur e Jurel Yellowfin aki riba beach, y tabata contento cu mey-mey di siman algo asina a socede, caminda nan a hasta perde conteo ta cuanto pisca nan a captura.  Aunke hopi hende ta mira esaki como bendicion, otronan ta mira cu kizas un fenomeno di naturalesa riba lama a pone cu e piscanan aki a perde ruta y a bin finalisa cerca di oriya di lama.  E fenomeno di ‘beaching’ cu e piscanan aki a haci, a wordo studia pa hopi tempo caba, como cu principalmente e sa wordo observa cu e.o. bayena y tambe dolfijn.

   A ser splica, cu na luna di Mei na aña 2022 tambe, algo similar a socede cu mesun tipo di piscanan aki na Taganga.  Pues e storia a ripiti su mes.

   Piscanan a wordo bendi na gran cantidad riba Diaranson na pueblo di Taganga.