Luis Chong di GKMB:
ORANJESTAD (AAN): Director di Gele Koorts Muskieten Bestrijding a duna di conoce recientemente cu na Aruba no tin brote di Dengue. El a enfatisa hopi si riba e parti di prevencion y pa evita criaderonan di sangura.
El a splica cu e unico manera cu e transmision di dengue por tuma lugar ta via e sangura. Hende no por pega hende den cercania cu dengue, pero si e por sosode pa via di un sangura. Mester tin un sangura entre e persona cu ta malo y despues pas'e pa un otro persona, a indica.
Esey ta e unico manera di propagacion di dengue y esey ta locual ta purba preveni. Ora ta papia di prevencion ta papia di elimina e sangura. Menos sangura, menos chens tin di transmiti dengue y yega te na un 'outbreak', Chong a remarca.
Semper ta keda e peliger di e casonan importa. Hendenan cu ta bin di afo, cu por ta un local of un turista, cu a bay cu vakantie of cu ta bishita Aruba y ta drenta Aruba malo cu dengue. Si tin e sangura aedes aegypti rond di e cas of unda e ta hospeda, tin chens cu ta infecta henter famia of esnan rond di dje.
Dengue, Zika y Chikungunya ta malesanan cu ta wordo transmiti solamente door di e sangura aki, esta aedes aegypti, Luis Chong a enfatisa.
Mirando e situacion cu tin den e region, den Caribe y Latinoamerica, no ta bon pa yega cierto casnan na Aruba y topa hemchi cu bari di awa yen di sangura.
