Colegio Arubano a presenta e rekisitonan nobo di admision na Ciclo Basico 1

ORANJESTAD (AAN):  Recientemente autoridad di Colegio Arubano a establece e rekisitonan di admision pa e aña escolar venidero.

E directiva di Colegio Arubano representa pa rector sr. Tim Croes y conrector di Ciclo Basico 1 y 2 sra. Jennifer Arends–Reyes a presenta dialuna pasa, durante un reunion informativo na e scolnan basico, e rekisitonan nobo di admision pa Ciclo Basico.

            Na e ocasion aki a invita tur scol basico. Den pasado Colegio a utilisa su propio prueba di admision, e 'Colegiotoets', como un di e rekisitonan pa drenta Ciclo Basico. Desde algun aña pasa, Aruba a introduci e 'Doorstroomtoets' nacional pa tur alumno di klas 6 di scol basico. E prueba ey combina cu recomendacion di e scolnan basico hunto cu rapport di klas 5 y 6 ta forma e criterianan pa admision.

            Desde aña escolar venidero, Colegio lo aplica cuatro scenario. Un alumno cu por lo menos ta cumpli cu un di e scenarionan ta admiti na Ciclo Basico 1.

Cu introduccion di e cuater scenarionan Colegio Arubano ta hustifica e potencial di e alumnonan cu a completa scol basico cu exito.

            Riba e website www.colegioarubano.aw a describi e cuater scenarionan.

Proximamente, lo publica riba e website un funcion, cu lo yuda e futuro alumno y nan mayor pa facilmente comproba si ta cumpli cu e rekisitonan di admision.

            Colegio Arubano ta ofrece enseñansa secundario riba nivel di havo/vwo y tin un historia di casi 65 aña. Actualmente, e scol tin 1300 alumno y mas di 80 docente. Colegio Arubano ta un scol solido y popular, unda varios generacion di profesionalnan a studia. E ta un scol catolico habri pa tur grupo di religion.

            Pa finalisa, Colegio Arubano ta gradici tur hende cu a asisti na e encuentro informativo. Solamente hunto nos ta para fuerte pa e bienestar di nos muchanan y nan futuro!