AZV a presenta Cuadro Financiero Multi anual na CAFT

ORANJESTAD (AAN):  Diahuebs 19 di october ultimo e College Aruba Financieel Toezicht (CAFT) a bishita Organo Ehecutivo AZV.

            Durante e reunion aki, Organo Ehecutivo AZV a presenta e modelo cu a wordo desaroya pa proyecta e situacion financiero di e siguiente 10 aña y mas. E exigencia di Gobierno Hulandes pa corta 60 miyon florin den cuido medico ainda ta riba mesa y e Organo Ehecutivo AZV ta mustra pa medio di e Cuadro Financiero Multi Anual cu e cambionan cu a wordo haci for di 2020 ta resulta den un bahamento di gasto mesun comparabel cu e 60 miyon riba termino largo; incluyendo un impacto mas chikito den e pakete di cuido y e prima di AZV.

            CAFT a reacciona positivo riba e modelo y ta elogia trabao cu a wordo haci pa realisa esaki. Si e instrumento di Cuadro Financiero Multi Anual presenta lo ta suficiente pa reemplasa e medida di 60 miyon mester sali na cla ainda.

            E Cuadro Multi Anual Financiero como instrumento ta hopi util pa maneha e gasto y entradanan di e Fondo di AZV a riba termino medio y largo. Ademas e modelo ta permiti calcula impacto di maneho riba e gastonan den tempo.

            Gerencia di Organo Ehecutivo AZV ta gradici di curason e equipo di expertonan di tanto paden como pafor di Organo Ehecutivo AZV cu a participa den e realisacion di e proyecto asina importante pa Aruba y pa futuro di cuido: Cuadro Multi Anual Financiero. Cu e instrumento aki Organo Ehecutivo di AZV por sigui garantisa bon acceso na cuido di calidad y cuido eficaz y pagable.