Hose Figaroa, presidente di FTA:
ORANJESTAD (AAN)—Presidente di e Federacion di Trahadornan di Aruba (FTA) mr. Hose Figaroa, den un entrevista cu DIARIO a toca e tema di costo di bida, hopi halto, cu nos pueblo ta confrontando.
Figaroa a señala cu si wak e cifranan di aumento di costo di bida, di forma oficial, e no ta mustra di e tanto ey, pero si wak e prijsnan riba caya ta parce cu tin un desconexion entre e realidad teoretico y e realidad cu e consumidor ta topa cune riba mercado.
“Prijsnan ta subi di un manera drastico tur caminda y esey ta haci cu e poder di compra ta bay atras. Por menciona e salario minimo, y semper aki na Aruba tabata tin e problema cu e palabra minimo kiermen lo menos cu bo mester pa por sobrebibi, pero e termino riba su mes ta incorecto, pasobra si bo wak kico e minimo di subsistencia ta, segun CBS ta calcul’e, y recien el a wordo ahusta atrobe, el surpasa 2500 florin pa luna, pa un hen de su so den cas. Esey kiermen cu pa mi sobrebibi, segun CBS e mester ta algo mas cu 2500 florin pa luna”, Figaroa a subraya.
El a agrega cu e salario minimo ta como 600 florin leu for di subsistencia eynan. E ora ey, e pregunta ta: “Con mi sobrebibi?” Un persona cu ta trahando pa un salario minimo, ta imposible p’e sobrebibi. Esey kiermen cu, of e tin cu haci un trabao acerca, locual riba su mes no ta e manera ideal tampoco. “Hopi aña pasa tabata tin luchanan grandi cu sindicatonan, etc., pa yega na e dia di trabao di 8 ora. Pero e ocho oranan ey mester ta oranan di trabao completo. No cu mi ta traha ocho ora na un trabao y mi ta traha ocho ora na otro trabao, pasobra di facto bo ta traha 16 ora. Ni cuater ora den otro trabao pasobra e ora ey bo ta traha 12 ora den un dia. Hasta ley ta bisa cu bo no por traha mas di 12 ora pa dia si bo tin cuater ora di overtime pa dia, etc.,” Figaroa a remarca.
Hose Figaroa a señala cu debi cu e distancia entre e salario minimo entre e minimo suma pa subsistencia ta bira cada dia mas grandi, bo ta haya cu cada biaha e ta bira mas y mas dificil, pa biba di un solo trabao y sigur si ta un trabao cu paga menos cu e minimo di subsistencia.
Kizas tin hende ta bisa: no, pero hopi hende no ta gana salario minimo, pero tin hopi hende cu si ta gana dos mil florin pa luna.
“Dos mil florin pa luna, ainda ta 500 fls menos cu e minimo di subsistencia, hasta si bo gana 2.400 florin pa luna, bo ta 100 florin menos cu e minimo di subsistencia”, Figaroa a remarca y a subraya cu tur hende cu gana menos di 2500 florin pa luna, tin un problema, segun calculacion di CBS!
