Coleccion Digital di Aruba a sobrepasa 200.000 articulo  

ORANJESTAD (AAN): Departamento di Coleccion Digital hunto cu Departamento Arubiana-Caribiana di Biblioteca Nacional Aruba ta anuncia logronan importante den coleccion digital

   Biblioteca Nacional Aruba (BNA) ta orguyoso di anuncia un milestone significativo: recientemente a yega na e cantidad di mas cu 100.000 item digital den e coleccion digital di Biblioteca Nacional Aruba (coleccion.aw/bna).

   Ademas, cu e logro aki, Coleccion Aruba a sobrepasa tambe e cantidad di 200.000 item, unda Biblioteca Nacional Aruba ta e contribuyente mas grandi, representando casi 55% di e total di e coleccion. E otro contribuyente grandi na Coleccion.aw ta Archivo Nacional Aruba, cu recientemente a yega na un cantidad di 85.000 item digital, y cu recientemente a añadi miles di potret digitalisa for di entre otro nan coleccionnan di BUVO y di Sr. Rinus de Graaff (coleccion.aw/ana).

  “Cada documento ta un testigo cu ta bisa: mi a existi, mi a conta un historia tocante Aruba. Den esey mes ta e forsa di documentacion: e ta duna bos eterno na pueblo y ta sigura cu nos pasado semper tin un luga den presente y futuro.” -Zetsia Ponson, Hefe Departamento Arubiana-Caribiana.

   "Hende sin conocemento di nan historia, origen y cultura, ta manera mata sin raiz. Pa e motibo ey, documentacion ta crucial; e ta preserva storia, tradicion, y experiencianan cu ta forma e fundeshi di nos identitad cultural y memoria colectivo". -Graciela Nedd-Cheng, Bibliotecaria/Documentalista

“E inclusion di e coleccion grandi di documentacion aki lo duna un “boost” grandi pa e acceso na tur nos fuentenan digital. E lo mehora e resultadonan di casi cada buskeda, y lo duna hopi mas contexto pa cada investigacion haci riba nos plataforma di Coleccion Aruba. Hunto cu nos partnernan BNA ta dedica pa conhuntamente duna acceso na nos patrimonio den forma digital, via www.coleccion.aw”. -Peter Scholing, hefe di Digitalisacion, Coleccionnan Digital y Investigacion, Biblioteca Nacional Aruba

   “Digitalisando y comparti e compilacionnan aki ta conserva mas cu historia. Nos ta reconoce e diferente bosnan cu ta forma e identidad di Aruba. Entre topiconan mas prominente di e ultimo decada na Aruba tin storianan tocante e comunidad LGBT y matrimonio di mesun sexo. Esaki ta un ehempel di temanan social cu ta refleha con nos isla a crece y cambia den transcurso di tempo”. -Ichmarah Kock - Coleccion Digital y Maneho di Informacion

   E ultimo coleccion cu a wordo añadi ta e prome parti di e documentacion digitalisa di Departamento Arubiana-Caribiana (coleccion.aw/documentacion).

   E coleccion aki lo contene mas cu 30.000 item, disponibel pa investigacion riba mas di 900 topico di interes local. Entre e materialnan tin articulo di corant y revista, krantenknipsels (newspaper clippings), cu ta cubri topiconan actual como historico, relevante pa e desaroyo social, cultural y historico di Aruba.

Pronto lo pone disponibel un lista di tema y topico di documentacion riba coleccion.aw, mescos cu un lista di titulo di corant y di revista, pa facilita e acceso y buskeda di informacion pa investigador, studiante y publico interesa.

  Biblioteca Nacional Aruba ta sigui comprometi cu e preservacion, digitalisacion y acceso di herencia documental di Aruba, pa sigura cu e conocemento local ta keda disponibel pa e generacionnan presente y futuro.  Bishita: coleccion.aw