Vision di Mike Eman cu SVT na Aruba awor ta inspira otro pais den Reino

A hala atencion di St. Maarten

ORANJESTAD (AAN): E programa Sociale Vormingstraject (SVT), introduci na Aruba na 2010 como un vision di Prome Minister Mike Eman, ta sigui demostra su balor como un instrumento eficiente pa desaroyo di hubentud. E programa ta enfoca riba disciplina, formacion di caracter, guia personal y preparacion pa mercado laboral, brindando hobennan cu ta den dificultad un segunda oportunidad pa construi un futuro positivo.

   E impacto di SVT na Aruba awor ta sirbi como ehempel pa otro pais den Reino. Parlamentario di St. Maarten, Sjamira Roseburg, a bishita Aruba recientemente pa informa su mes tocante con e programa ta funciona y con su efecto positivo ta riba desaroyo di hubentud y adultonan hoben. Durante su bishita, el a sostene reunionnan cu personal militar directamente envolvi den e ehecucion di SVT.

   Roseburg a indica cu St. Maarten tin un falta di programanan structura cu ta combina guia, disciplina y mentor pa hobennan. Segun Roseburg, un modelo adapta di SVT por pone mas enfoke riba prevencion, specialmente pa hobennan entre 12 y 18 aña, sin laga afo adultonan hoben cu tambe por beneficia di e programa.

   E parlamentario a enfatisa cu SVT no ta un castigo, sino un programa di guia social cu ta den union cu sosten militar, trahadonan social y educadornan pa forma hoben cu mas confianza, responsabilidad y habilidadnan di bida. E meta ta pa yena un bashi importante den e sistema di sosten social na St. Maarten.

E exito di SVT na Aruba ta confirma cu un inversion den hubentud cu vision y structura por duna resultadonan positivo y sostenibel. Awor, e modelo Arubiano ta sirbi como inspiracion regional, mustrando cu iniciativa nacional por traspasa frontera y contribui na fortalesemento di hubentud den otro pais den Reino.

   Recientemente tambe a tuma luga e Graduacion SVT na Aruba unda cu hobennan ta cosecha fruto di nan esfuerso.

   Cu hopi orguyo e hobennan cu a termina e programa Sociale Vormingstraject (SVT) na Aruba a tuma parti na un ceremonia di graduacion presidi pa Premier Mike Eman.  Participantenan manera G’Dior Tromp, Bradley Werleman y Kendrick Yarzagaray a comparti cu nos nan experencia: na comienso e tabata dificil, pero cu disiplina, guia y colaboracion, nan a logra sobrepasa retonan y cambia nan futuro.

Minister Mervin Wyatt-Ras tambe tabata presente na e graduacion di SVT. Minister di Asuntonan Social y Salubridad, Mervin Wyatt-Ras, tabata presente na e ceremonia di graduacion di SVT (Vogatie- en Technische Dienst). Su presensia na e evento a refleha e compromiso continuo di e ministerio pa sostene desaroyo social y educativo den e comunidad. E Minister a pone enfasis riba e importancia di formacion tecnico pa futuro di hobennan y pa fortifica e bienestar social riba nos isla.

   SVT ta combina entrenamento militar (Fase 1) y curso di stage/trabao (Fase 2) pa hobennan entre 17–25 aña, dunando nan e oportunidad pa studia, prepara pa trabao y construi confianza y responsabilidad. Mas cu 80% di graduadonan a logra sigui un trabao of entrenamento, incluyendo hende muhe hoben.

Siguiente trayectoria SVT 2026 ta cauminsa 9 di maart 2026. Hobennan interesa pa inscribi of por acudi na: Mariniers Kazerne Savaneta, Bureau Sociale Vorming, of tuma contacto cu Jessica Ras.

   Aki por mira y comproba cu e exito di Aruba ta sirbi como modelo pa St. Maarten, cual Parlamentario Sjamira Roseburg a bishita recientemente pa evalua con un programa similar lo por beneficia e hobennan na St. Maarten.

   Parlamentario Sjamira Roseburg a comparti su profundo respet y admiracion pa e vision di Prome Minister Mike Eman, kende a tene e balentia y conviccion pa crea un programa cu ta toca bida y cambia destino.

   “SVT no ta solamente un programa, e ta un regalo di speranza pa hopi hoben cu a pensa cu nan no tabata tin salida. E vision di liderasgo manera esun di Mike Eman ta mustra cu un pais por lanta su hubentud cu amor, disciplina y oportunidad. Aruba por sinti orguyo cu a sembra un modelo, cu awor ta florece tambe na St. Maarten,” Roseburg a expresa cu emocion.