Señora Dalgis Montalvo di Stichting Hunto:
ORANJESTAD (AAN): Señora Dalgis Montalvo di Stichting Hunto, den entrevista cu DIARIO a duna di conoce cu na aña 2025, Stichting Hunto a purba di amplia e parti preventivo riba e problematica creciente especialmente den nos hobennan pa loke ta trata adiccion y pensamentonan di suicidio. Prevencion, pa un isla chikito, ta hopi importante pa educa y conscientisa pero sigur tambe mustra tur e trabaonan cu e stichting ta haci, entre otro: charlanan na scolnan y organizacionnan y forum tocante di bullying.
El a remarca cu tambe a reforsa e ekipo di psicologo pa brinda ayudo miho na comunidad y mirando e necesidad cu tin eyfo, kier amplia e servicio aki mas ainda. No solamente atende cu e problematica cu tin, sino pa traha mas riba e parti preventivo y no warda te ora un persona ya caba ta full den e problema y e situacion por bira mas dificil p’e, sino pa gara e problema for di tempran.
Señora Montalvo a agrega cu e lista di espera pa psicologia a baha te entre 6 pa 7 luna, considerando cu antes un persona mester a warda mas di un aña prome cu e wordo atendi pa un psicologo. Y ta purbando tambe pa baha e lista di espera mas ainda cu e maneho cu ta hibando. E periodo di intake ta tuma entre un pa dos siman maximo y tin ora menos.
El a remarca cu aunke nan ta purbando pa mehora, mester amplia e ekipo pa logra mas. Segun e, actualmente, e mesun trahadornan social ta yuda den casonan na cas, ta asisti na scolnan y duna informacion den diferente encuentronan. Esaki ta mesun cos pa psicologonan. E mesunnan ta esnan cu ta sinta den oficina pa atende cliente, ta bay scolnan y ta duna trainingnan. Pa e motibo aki, el a remarca, Stichting Hunto a haci peticion pa amplia subsidio pa asina nan amplia e ekipo pa brinda mas ayudo na nos comunidad, na un manera gratis.
“E problematica tey. Y hopi hende no por paga un psicologo facilmente. P’esey Stichting Hunto ta purbando pa amplia e servicio y e por ta gratis na unda cu un ciudadano por yega y haya e ayudo necesario y mesora. Ey ta unda nos kier bay pasobra e necesidad ta grandisimo”, el a remarca.
Segun el a enfatisa, e parti preventivo ta keda hopi necesario pa mustra e ciudadano con pa yega na ayudo, con pa regula emocionnan y con pa yuda nan mes. Tambe, con pa yuda e ciudadano cu ta cana cu pensamento suicidal y purba calm’e.
“Aunke cu tin casonan cu manera e ciudadano tuma e decision pa caba cu su bida, no por haci mucho mas p’e. Pero e parti di prevencion ta keda uno cardinal y hopi necesario ”, señora Montalvo a menciona.
