Cocaina bon scondi den rand di porta di container na Suriname

PARAMARIBO: Den tur espacio den e porta di hero di varios container cu tabata riba tereno di Waf na Suriname, a bin haya cocaina scondi. 

Ta trata aki di cuatro container yena cu aroz cu tabata cla pa wordo manda pa exterior.

   E descubrimento aki a wordo haci door di Polis, hunto cu unidad di K9, y miembro di Port Controle Unit.  Cacho a detecta e droga!  Ora cu Polis a bay manda un drill di boormachine den e porta, e drill a sali bek blanco di puiro.

   Polis a bisa cu narcotraficantenan a yena e portanan di hero aki cu cocaina, y despues a weld nan bek cera hermeticamente.  Ta trata di cuatro container di 20 pia cada uno, yena cu aroz y destina pa Waf di Rotterdam.

   Bomberonan di Suriname a bin duna yudanza pa asina kibra e portanan, y saca e droga.  Te ainda no ta conoci ta cuanto droga tabatin den nan.