Club di landamento Giants Aquatics Aruba cu un anochi di cena y premio

ORANJESTAD (AAN): Nan a yega cu hopi animo pa un anochi agradable riba patio di Universidad di Aruba. 

Esnan di e club di landamento Giants Aquatics Aruba a tene un cena pa tur nan landadonan miembro y mayornan. Na mes momento, Giants a haci entrega di e premionan na e landadonan kendenan a destaca den 2021.

   Fundador di Giants, coach Jordy Groters a resumi e dos aña di existencia di su club y a subraya con orguyoso e ta di tur su landadonan mirando e progreso den cada un di nan prestacion.  El a gradici e mayornan pa e confianza deposita den su persona pa entrena e hobennan.

   Figurabo cu di un grupo chikito dos aña pasa, Giants Aquatics a crece e bira un club grandi cu no menos cu 52 miembro. No tin duda cu Giants lo bira mas grandi aun.

   Zuleika Silva kende ta President di e Club, a duna un splicacion di con Giants ta un berdadero club di famia cu tur hende lo sinti nan mes na cas, un aceptacion cu bo no la haya un otro caminda.

   E anochi aki a haci entrega di Premio na e landadonan cu destaca den 2021.

   Premio di “Male and Female Rookies of the Year 2021” a bayu pa Luis-Mario Arends y Alyssa Ras.  Premio di “Male and Female Relay Rockstars of the Year 2021” a bay pa Hau Yan Chan y Kami Lacle.

   Premio di “Most Improved Male and Female Swimmers of 2021” a bay pa Gideon Flanegien y Zoë Engelhart.  Premio di “Male and Female Race of the Year 2021” a bay pa Ian-Zion Bakmeyer pa su prestacion na e 200m freestyle na Campeonato Arubano 2021.  Tambe pa Celine Samson pa su prestacion di 50y breaststroke finals na Plantation Winter Championships.

   Premio di “Male and Female Swimmers of the Year 2021” a bay pa Inald Fernandes Perna y Noemie Erasmus.

   Tambe coach Jordy a entrega un regalo na Mario Arends kende a percura pa e dushi cuminda e anochi aki. Na final tur landado di Giants a ricibi un certificado for di man di coach Jordy y coach Kevin pa nan tremendo prestacion den e aña 2021.

   E anochi aki tambe a presenta na e publico presente e directiva nobo di e organizacion di Giants.