ORANJESTAD (AAN): Full un edificio bunita, asfalt bon poni, muraya bon geverf, y un interior mucho mihor organiza cu nunca antes.
Aunke pafo riba Caya Dr J.E.M. Arends (e caminda pariba di Hospital) tin dos borchi pa mustra chauffeurnan den cual hanchi publico tin di drenta pa bay pa ‘Emergency’, toch ora bo drenta no tin ningun borchi mas net na e entrada mes di e entrada di Servicio di Emergencia, conoci ainda den publico como ‘Eerste Hulp’.
Consecuencia di esey ta cu tin biaha tin autonan cu ta drenta den e hanchi aki, pero no ta mira ningun borchi di ‘Emergency’, y pesey nan ta bira bek y sali pafo. Nan ta bay bek na e entrada parti dilanti unda ta puntra Security, unda exactamente e Servicio di Emergencia (SEH) aki ta situa.
DIARIO a tuma nota cu enberdad e entrada principal di ‘Emergency’ no tin ningun borchi poni na halto, na banda, ni tampoco riba e borchinan di trafico cu tin net ey dilanti. Tin biaha hende ta drenta y mira Ambulans staciona mas pabao, y ta kere cu ta eynan ta entrada.
Spera cu pronto e entrada di Servicio di Emergencia por haya un borchi.
