Claudia Daher Ponson ta lansa su prome novela ‘R.A.T.S’

‘Revolutionary Army of Teens, We are One’

ORANJESTAD (AAN): Claudia Daher Ponson, un storyteller, artista y entrepreneur local, a haci su debut como autor cu su novela inspirador titula “R.A.T.S – Revolutionary Army of Teens, We are One.” E obra ta un refleho di su bida, inspira pa medio di proposito, fe y amor familiar, y ta busca pa crea consciencia y empoderamento pa medio di arte y creatividad.

  Claudia ta kere firmemente den poder di palabra y imaginacion pa cambia e manera con nos wak mundo. Su novela a haya sosten di editornan di renombre mundial manera Pegasus, Amazon, Foyles y Barnes & Noble, entre otro, un logro di gran orguyo pa un autor local.

   Claudia recientemente a presenta un tema musical poderoso – un himno di inspiracion cu el a interpreta pa e conocido cantante local Miguel Genser. E video musical tabata filma den un ambiente natural y simbolico: riba beach, cu muchanan di St. Franciscus College bao guia di juffrouw Nadine Kirindongo y Scol Hilario Angela cu directora Señora Ruth, tur bisti na blanco como simbolo di union y paz.

   Despues di e lansamento di su buki, Claudia a sigui inspira comunidad. El a cuminsa cu firma di su buki den librerianan local, compartiendo momentonan di alegria cu lector y fanaticonan. Adicionalmente, el a tuma parti den actividadnan educativo na scol Prome Paso na Savaneta, bao guia di cabesante Gislain, durante e siman di buki. E muchanan a haya oportunidad pa papia cu e autor y pa ricibi su mensahe di fe, speranza y creatividad.

   Como parti di e celebracion di Festival di Buki pa Mucha, Claudia tambe a bishita Biblioteca Nacional di Aruba, caminda el a entrega un ehemplar di su novela na Señora Lilian Semeler, simbolisando su aporte na cultura y literatura Arubiano.

   Claudia Daher Ponson ta un ehempel bibo di inspiracion y perseverancia. Su deseo ta cla: pa motiva otro pa persigui nan soñonan y pa crea un mundo di amor, union y speranza. ‘We are One’ no ta solamente un subtitulo, ta un mensahe poderoso pa e hobennan rond mundo, cu diferente ‘backgrounds’ pa uni cu un mision: cambia mundo a traves di respet, curashi y amor.