Prome Ministernan Eman y Schoof a palabra apoyo di Hulanda pa proyectonan grandi pa Aruba
- Pa Aruba por absorba mas energia solar y di biento
- No a menciona si ta un regalo of atrobe mas debe
ORANJESTAD (AAN): Manera ta conoci, awor cu e ta saliendo como Prome Ministro di Hulanda, Dick Schoof a haci un bishita na Aruba.
Prome Minister mr. Mike Eman a yama Premier Schoof danki pa traha tempo den su agenda pa bishita Aruba pero tambe pa e cooperacion acorda pa un proyecto di gran embergadura pa San Nicolas. Premier Eman a comparti e noticia cu gobierno a tuma e decision pa desmantela e locual a keda di e refineria y sanea e tereno completo. Esaki pa desaroya algo cu ta cuadra cu e direccion den cual mundo completo ta moviendo aden, esta energia renovabel y limpi.
Lo desmantela refineria: Premier Eman a indica cu a pidi asistencia di expertonan Hulandes den e ramo di desmantelacion di areanan petrolero y limpiesa di e area cual ta rekeri experticio specifico, y Schoof a compromete na duna e sosten tecnico aki. Riba esaki tin un otro articulo awe den DIARIO relaciona cu e anuncio ey.
Prome Minister di Hulanda Dick Schoof a dirigi un mensahe importante tocante e tension geopolitico den region, cambio climatico, y e cooperacion continuo entre Hulanda y Aruba den marco di Reino.
Prome Minister Schoof a reconoce cu tin hopi desaroyo actualmente den Caribe: “Tin hopi cos ta pasando, specialmente mirando e tensionnan geopolitico den area di Caribe. Nos ta compronde cu tin preocupacion pa e desaroyonan aki. Schoof a sigura cu ministerionan di Defensa y Asunto di Exterior ta sigui e situacion di cerca, ta tene contacto constante cu e autoridadnan local y ta mantene nan bon informa.
Yuda cu 110 miyon Florin: Relaciona cu e recien cumbre climatico COP30 na Belem, Brasil, e Premier Hulandes a subraya e importancia di e tema climatico pa nos region:
“Na COP30 a papia di e esfuerso cu paisnan ta haci pa logra e meta di no pasa di 1.5 grado di aumento di temperatura, pero tambe di adaptacion, implementacion y financiamento climatico. Esakinan ta topiconan crucial pa Aruba, mirando cu Reini ta sinti e impacto directo di subida di nivel di lama y tempo extremo.
Schoof a dedica parti importante di su discurso pa felicita e gobierno di Aruba: “Mi kier felicita Prome Minister Eman y su gabinete pa e decision importante pa redestina e tereno di refineria pa algo mas sostenibel. Esaki no ta un paso facil, pero sin duda un momento historico y crucial pa Aruba.
Ademas a anuncia cu Hulanda lo sigui duna apoyo concreto na Aruba den e transicion energetico: “Hulanda ta apoya Aruba activamente den e proceso di transicion energetico. Nos a dicidi pa otorga 53.6 miyon Euro cu ta cerca di 110 miyon florin pa fortalece e red di electricidad di Aruba. Esaki lo permiti cu Aruba por absorba mas energia solar y di biento, lo crea mas trabao, y lo contribui na un bienestar mas amplio pa tur ciudadano.”
Den su discurso chikito, e no a menciona ki tempo e yudansa di casi 110 miyon Florin lo wordo manda, tampoco si ta den forma di placa, of ta den forma di yudansa, conseho, y experticio pa traha riba energia sostenibel, y tampoco si e placa aki ta forma di ‘regalo’ of cu tin di bay paga esaki bek.
E Premier a termina su mensahe mirando pa futuro y pa cooperacion regional: “Di aki mi lo sigui mi bishita pa Colombia pa e Cumbre di Union Europeo cu Latinoamerica, caminda nos lo trata tema di cooperacion cu paisnan Latinoamericano y Caribense. Seguridad den e region y esfuersonan contra criminalidad na frontera lo ta topiconan importante.”
“Cooperacion ta clave, tanto entre paisnan den e region como entre e diferente paisnan di nos Reino, semper basa riba igualdad y respet pa autonomia di cada un.”
Na final, Premier Eman a gradici su homologo Schoof pa e sosten na Aruba pero tambe pa a yuda fortalece e relacion cu Aruba den Reino durante su periodo como Premier gobierno Hulandes.
