Clarice Holman cosechando exito internacional

Na ‘National Poodle Specialty’ na Merca

ORANJESTAD (AAN): Recientemente a tuma lugar e National Poodle Specialty na St.Louis Missouri organiza pa PCA (Poodle Club of America). E competencia mas prestigioso di poodle na Merca unda poodles di tur 3 tamaño ta bin hunto di tur parti di mundo pa competi contra otro.

Nan ta competi den diferente modalidad. Conformation, obedience,  Fast Cat y Agility. Paisnan y profesionalnan cu a participa ta procedente di: Aruba,  Merca, Hulanda, Canada, Taiwan, Venezuela, Colombia, Brasil, Spaña, Suiza, Singapore,  Scotland, Dinamarca, Zuid Africa, Rusia, Peru, Noruega, New Zealand, Mexico, Korea, Japan, Ireland, Indonesia, Israel, Francia, Finland, England, Estonia, Chile, Bermuda, y Australia.

   Aruba su talentoso ‘Master Groomer’ y columnista internacional Clarice Holman un bes mas a briya cu su talento na e competencia y a laga Aruba su nomber den halto den ramo di Professional Dog Grooming.

El a prepara cachonan pa participa den obedience, parade of champions y tambe e Dog Show mes. El a prepara 2 cacho di Merca y 2 cacho di Mexico.

   Tur a saca premio y Mexico a logra bay cu prome puesto den su categoria. Tur doño di e cachonan tabata yena di orguyo con nan cacho a luci durante e show danki na e mannan talentoso di nos Master Groomer Clarice Holman.

   Mas y mas e mundo internacional di professional Dog Grooming riba nivel di show ta reconoce y solicita Clarice Holman su talento y experticio pa pone nan cacho briya ainda mas den ring.

   Palabra di felicitacion na Clarice Holman pa su logro y ta admira su trayectoria y reconocimiento internacional, como cu e ta e unico profesional den e ramo aki den Caribe riba e nivel aki.