Apertura oficial di e di cuater edicion di hende muhe den Para Sports den Region Americano

Minister Gerlien Croes

ORANJESTAD (AAN): Riba Dia di Labor, 1 di mei, Minister di Deporte, sra. mr. Gerlien Croes tabata tin e grato honor di inicia y oficialisa e di 4 edicion di e “Women in Para Sports Americas Summit”, un cumbre importante pa region Americano cu Aruba orguyosamente ta anfitrion. E cumbre aki ta tuma luga riba 1, 2 y 3 di mei na Aruba, reuniendo lider, atleta y profesionalnan den para deporte y deporte en general pa comparti conocemento, experencia y inspiracion.

E evento a logra reuni mas di 85 participante local y internacional, cu representacion di 29 pais den region Americano, tur participando activamente den un programa dinamico enfoca riba inclusion, liderazgo y desaroyo den para deporte. E presencia amplio di delegacionnan internacional ta confirma e importancia creciente di e cumbre aki como un plataforma regional pa progreso y colaboracion.

E prome dia a inicia cu un mainta hopi inspirador, unda muhenan den posicionnan clave di liderazgo a comparti nan historia, vision y compromiso cu desaroyo di para sports. Durante e apertura, Minister Gerlien Croes a enfatisa e importancia di crea mas oportunidad pa muhenan, fortalece inclusion y sigui construi un ecosistema deportivo unda tur talento tin e oportunidad pa florece.

Despues di e apertura oficial, sra. Shardea Croes, chair di e cumbre, tambe e representantenan di Americas Paralympic Committee y Aruba Paralympic Committee, a dirigi palabra, resaltando e importancia di cooperacion regional y e rol crucial di liderazgo femenino den e evolucion di para sports.

E programa a continua cu un Panel di Discussion enrikecedor riba topiconan relevante pa muhenan den para sports y liderazgo den deporte, cu participacion di figuranan distingui manera:

sra. mr. Gerlien Croes, Minister di Deporte

sra. Shardea Croes, Chair di e cumbre

srta. Alia Atkinson, landado (Jamaica)

srta. Camila Hasse, landado (Argentina)

sra. Nicole Hoevertsz, IOC board member y chair di coordinacion pa LA28

sra. Barbara Ortiz, representante di United Nations

E dialogo a enfoca riba oportunidadnan, retonan y e importancia di representacion femenino den deporte, sirbiendo como un fuente di inspiracion pa tur presente.

Durante e siguiente dianan, e cumbre lo ofrece un serie di sesionnan interactivo y specialisa, reparti den tres area principal:

Sports Mom & Community Leaders – enfoca riba e rol di mama y lider comunitario den deporte

Intro to Para Coaching – introduccion y capacitacion basico den coaching di para sports

Women in Sports & Leadership – fortalecemento di liderazgo femenino den deporte

E sesionnan aki ta crea espacio pa desaroyo di habilidadnan, intercambio di conocemento y formacion di conexionnan significativo cu lo contribui na crecemento continuo di para sports den nos region.

Gobierno di Aruba ta contento di por a brinda e apoyo y colaboracion pa asina Aruba por a bira anfitrion di un otro encuentro internacional di e nivel halto aki. Hunto, nos ta sigui eleva y fortalece deporte na Aruba, mientras cu liderazgo ta wordo empodera y oportunidadnan nobo ta wordo crea pa nos comunidad, Minister Gerlien Croes a enfatisa.

Minister Gerlien Croes a felicita y gradici tur esnan cu a haci e cumbre aki posibel—organisadornan, partnernan, boluntario y tur colaboradornan—pa nan compromiso y dedicacion. Sin nan esfuerso, un iniciativa di e magnitud aki no tabata posibel.

Na final, Minister Gerlien Croes a anima tur participante pa haci uzo di e oportunidad unico aki pa siña, conecta y inspira otro. E cumbre aki ta mas cu un evento—ta un movemento cu ta impulsa cambio positivo, surpasa barera y habri porta pa e siguiente generacion di lider y atleta den para sports.

Hunto, nos ta sigui construi un futuro unda inclusion, igualdad y oportunidad ta na centro di deporte—un futuro unda tur hende, sin excepcion, tin su luga pa briya.