Ciudadano di edad grandi spanta cu e lo perde su lugar di landa na Palm Beach

ORANJESTAD (AAN): Un ciudadano di Aruba, kende a identifica su mes como ‘adulto di 96 aña di edad’, riba Diahuebs a yama DIARIO pa expresa su mes.

   E persona aki a splica cu pa hopi aña caba, ainda cu su edad grandi, e ta acudi tur mainta na Palm Beach, pa e bay landa na e costa cu tin net banda di e Warda di Strandpolitie.

  Net panort di esaki, tin un palo di kwihi unda e ta pone tur su articulonan eynan, y despues cana e pida beach y drenta lama pa baña un rato.  E ta haci esaki pa su salud y pa disfruta di tur  eventahanan cu bo ta haya door di bishita lama.

   Sinembargo awor un Resort nobo a caba di yega eynan, y na un forma hopi visibel y hasta intimidante a tuma over full e pida beach aki.

   E ciudadano a splica cu e no ta di acuerdo cu esaki, como cu e pida pabao di e tereno di e Resort nobo, tin dos pilar color blauw.  Segun el a splica, e dos pilarnan blauw aki ta indicador te unda nan tereno ta.

   Pero e ta mirando con e Hotel ta hasta “tuma 2 meter mas pafo” di e pilarnan aki.

   El a splica cu no ta e so ta haci uso di e lugar aki, pasobra tin mas hende grandi ta bay eynan, y awor no tin lugar pa nan yega eynan mas.

   Algo lamentabel ta cu eybanda den pasado e por a para su auto mas cerca pa e bay landa un rato.  Pero awor esey a bira algo dificil.

   E kier sa si acaso autoridad ta vigilando loke e Resort aki ta haciendo, si acaso e ta viola e famoso ‘Beach Policy’ cu Gobierno a introduci algun aña pasa.  Y tin rumor ta core cu hasta e palo grandi di kwihi posibelmente lo wordo kita di eynan.  Ta di spera cu esey no ta socede, como cu e palo di kwihi aki tin hopi aña eynan, y ta hasta un simbolo historico pa Palm Beach.

   Spera cu Gobierno duna un declaracion riba e asunto aki, pasobra sikiera e grandinan por haya un pida espacio pa nan por bay disfruta di beach un rato.