Union di Taxistanan a entrega carta na lidernan di tur fraccion

Parlamentario Tevreden:

*Kier haya claridad riba e proceso final di otorgamento di 50 permiso di taxi 

ORANJESTAD (AAN)—Un representante di Union di Taxistanan a acerca Parlamento di Aruba, y a entrega tur e lidernan di fraccion un carta cu un peticion cu nan ta haci como ciudadano y como taxista, unda cu nan kier claridad riba e proceso final riba e otorgamento di 50 permiso di taxi.

            Asina Parlamentario Hendrik Tevreden, di fraccion di MEP, a trece dilanti den un entrevista cu DIARIO.

            “Nos sa cu esey tabata un polemica den e ceramento di eleccion prome cu esaki a caba di pasa, tabata tin problema cu taxistanan door di diferente punto, y esaki tambe tabata un di nan. Riba esaki nan kier claridad, y den nos rol como lider di Fraccion di MEP, nos a manda puntra señora Croes, Presidente di Parlamento, kico ta su posicion basa riba e carta cu a wordo entrega na Parlamento, si e ta bay yama un reunion tocante esaki. Di con? Primordialmente, si nos por invita e minister pa e por duna informacion, e guia y descripcion di unda e ta para aworaki den e proceso; kico el a scoge pa haci, na ki estadio e ta di e caminda aki di e taxistanan, y un bez cu por presenta esey na Parlamento, e comunidad henter y specialmente e taxistanan por wordo informa si tin claridad, anto e ora ey nan tambe sa kico ta e proceso y kico ta e pasonan final cu mester tuma lugar”, Parlamentario Tevreden a declara.