Segun Oficina Central di Estadistica
ORANJESTAD (AAN): Informacion nobo di Oficina Central di Estadistica ta indica cu e E CPI pa luna di December 2024 ta 109.07, loke ta representa un caida di 0.2% compara cu e indice di November 2024 (109.25).
E cambio di e CPI pa e ultimo diesdos (12) lunanan (December 2023 te cu December 2024) ta 0.3%, un caida di 2.0 punto di porcentahe (ppt) compara cu e periodo corespondiente di aña pasa (2.3%).
E promedio anual (ultimo 24 luna) di e tasa di inflacion pa e periodonan di December 2021 te cu December 2022 y December 2023 te cu December 2024 ta 1.7%, un caida di 1.7 ppt compara cu e 3.4% registra den e periodonan di December 2020 te cu December 2021 y December 2022 te cu December 2023.
Durante e luna aki, cinco (5) di e diesdos (12) sectornan a registra caida di prijs. E caida cu tabata tin e mayor efecto riba e CPI a worde registra pa e sector di “Transporte” (-1.5%), causando un efecto di, -0.19 ppt. E caidanan den e sectornan restante a contribui cu un efecto di -0.19 ppt riba e CPI di December 2024.
E caidanan aki a worde contraresta parcialmente door di principalmente un subida den e indice di e sector di “Recreaccion y cultura” (1.7%) cu a contribui cu un efecto di 0.15 ppt riba e CPI di December 2024. E subidanan den e sectornan restante a contribui cu un efecto di 0.08 ppt riba e CPI di December 2024.
E caida den e sector di “Transporte” a worde causa door di caidanan di 2.1% y 1.3% den e categorianan “Gasto relaciona cu uso di vehiculo di transporte personal” y “Compra di vehiculo”, causando un efecto di respectivamente, -0.17 y -0.06 ppt.
E subida den e sector di “Recreaccion y cultura” a worde causa principalmente door di subidanan den e categorianan “Vacacion” (4.1%) y “Servicio recreaccional y cultural” (1.3%), causando un efecto di respectivamente 0.09 y 0.04 ppt.
Canasta di consumo: E canasta di consumo di e CPI ta consisti di 408 bienes y servicionan. Compara cu November 2024, 40.2% di e bienes y servicionan aki a conoce un aumento di prijs causando un efecto di 0.63 ppt, mientras cu 42.6% ta mustra un caida di prijs, cu a contribui cu un efecto di -0.79 ppt y pa e restante 17.2% no tabata tin cambio den prijs.
Prijsnan di bienes a baha cu 0.4% y a causa un efecto di -0.25 ppt, mientras cu prijsnan di servicionan a conoce un subida di 0.2% y a causa un efecto di 0.09 ppt riba e CPI di December 2024.
Core inflation: E CPIC (core inflation) - CPI excluyendo e efecto di energia y cuminda - a registra na December 2024 un subida di 2.7%. E indice di energia - cu ta consisti di e productonan: electricidad, awa, gasolin y diesel - a registra un caida di 2.7%. E indice di cuminda a registra un subida di 2.3%.
