Un homenahe vibrante na Pop Art y alegria creativo
ORANJESTAD (AAN): Art is Fun Studio Aruba ta feliz di invita comunidad na su Exposicion Anual 2024-2025, un celebracion color y yen di energia inspira pa e icononan di arte pop: Andy Warhol, Roy Lichtenstein y Romero Britto.
E evento ta tuma luga dia 21 di juni 2025 (diasabra), for di 10:00 a.m. te 1:00 p.m. den Astor I Ballroom di The St. Regis Aruba Hotel & Resort.
Durante e exposicion, e trabou creativo di e studiantenan talentoso di e academia – mayormente mucha y hoben entre 3 y 16 aña – lo wordo mustra.
Durante e aña escolar, nan a explora y reinterpreta estilo y tecnicanan di Warhol, Lichtenstein y Britto: for di e serigrafia colorido di Warhol, e comic-style di Lichtenstein, te e patronchinan optimista y colornan vibrante di Britto.
Un di e punto di atraccion di e exposicion lo ta e obra di Mia Bella Dragonetti Meza, un hoben artista cu a diseña vestuario inspira den estilo di Arte Pop, bou mentor di Atelier Diego Giraldo. E desfile creativo lo ta un combinacion di arte visual y moda di nivel halto.
Ademas, e evento lo conta cu participacion di artista invita Yahaira N Maduro-Albus y un presentacion special di e gimnasta ritmico Ariana Croes.
Maria Magdalena Gonzalez Gonzalez, presidente di Art is Fun Foundation, a bisa:
"Nos ta sumamente orguyoso di e dedicacion y entusiasmo di nos studiantenan. E exposicion aki ta mas cu solamente un muestra di arte: ta un celebracion di creatividad, inspiracion y e poder di expresa bo mes den arte."
ENTRADA TA LIBER.
