Cinco candidata pa Miss Aruba a presenta nan mes

ORANJESTAD (AAN): Den fin di siman a tuma lugar den Ballroom di Hyatt Place Aruba Hotel,

un anochi special pa publico cera conoci cu e candidatanan nobo pa e certamen di Miss Universe Aruba.

   E anochi aki di ‘Meet & Greet’ tabata uno agradable, caminda publico a sinta na nan smaak y admira e cinco candidatanan cu a subi tur cu mesun outfit bisti, diseña pa Andrew Steba, pa asina combersa cu publico, y expresa nan pensamento riba e proteccion cu tin di duna na naturaleza den cuadro di ‘global warming’.

   E candidatanan cu a wordo introduci ta Milenka Janssen, Lorraine Oduber, Anaisa Orman, Gavriëla Bozo, y Karol Croes.  Nan tur a papia na ingles na un forma fenomenal, rapido, y cu hopi confianza den nan mes.

   Maestronan di ceremonia Thessaly Zimmerman y Nurianne Arias Helder a sa di presenta e preguntanan na un forma hopi rustig pa asina e candidatanan a sinti nan mes relaha.

   Tabatin presentacion tambe di e actual Miss Universe Aruba, esta Kiara Arends kende semper ta impacta cu su look y vestuario unda cu ta cu e presenta.

   Hopi comentario tabatin den publico, cu nan ta hopi interesa pa mira certamen di Miss Universe di e aña aki, awor cu e comision organizador a cambia reglanan drasticamente pa cu participacion for di rond mundo, incluyendo participacion di damanan cu ya caba tin yiu.

  Di awor caba, DIARIO ta desea cada candidata tur clase di exito.