Den un situacion mundial cu ningun hende por a pronostica
*Aruba mester di dam pa e por warda awa den tur sector
ORANJESTAD (AAN) — Na e momento cu e tabata ehecuta e encargonan cu Pueblo di Aruba pa medio di eleccion a pone den su man, hamas no Daniel Leo ni Aruba, por a pensa cu lo yega e momento cu e vision di Daniel Leo lo bira maneho mundial.
Sin duda, Aruba mester cuminsa duna mas atencion na e grupo di politiconan cu a maneha Aruba na caminda pa Status Aparte na 1986, pa asina por haya inspiracion den e trabou duro cu mester wordo haci pa por enfrenta futuro na 2023.
Importante ta keda pa no cubri politica cu un actitud di sofisticacion, pero pa duna continuacion na e recuperacion di Aruba na 2023 cu ta basa riba e mes pensamento cu a permiti Aruba pasa den situacionnan serio cu el a enfrenta na caminda pa realisacion di su Status Aparte na 1986.
Daniel Leo sin duda ta duna expresion na e lucha Arubano den cual el a pone enfasis riba e necesidadnan basico di Aruba.
Kico necesidad di un Pueblo ta? Kico necesidad di un hende ta?
Preguntanan cu Daniel Leo a contesta como hende cu a sirbi su pais como gobernante y mester uza su concenshi di hende y di miembro di un comunidad, pa por traha pa hende.
Pa traha como gobernante, no mester di palabra bunita ni thesis caro di buki cu ta cumpra na kilo.
Kico un hende mester? Na prome lugar e mester come pa e por biba.
Bon gobernacion ta nifica cu un hende tin cuminda pa come. Un condicion cu solamente desastre natural of di guera por kibra.
Pa e hende come, mester tin un infrastructura cu e pais por brinda. Pa comprende kico e pais por brinda y kico a bira problema serio pa Pueblo den historia.
Secura! Problema cu a wordo ocasiona pa falta di yobida cu a haci cu e prome exigencia di hende, a wordo afecta.
Pa por soluciona e problemam aki, na Aruba a traha tanki, e reserva di awa original di Aruba den tempo di yobida.
Awa cu mester a sirbi pa sembra den cunuconan, productor di cuminda pa Pueblo di Aruba cu mester a debolbe na cunuconan e balor cu otro profesionnan a kita durante desaroyonan mundial di Siglo 20.
Awa y cuminda pa Pueblo a pone produccion di cuminda atrobe na e lugar cu e merece den e economia total di e pais, cu tabata tin necesidad di infrastructura basico moderno.
Produccion di awa y coriente a bira uno di e retonan grandi cu Daniel Leo mester a enfrenta como Diputado.
Hamas nos por lubida e dia, cu coriente a bolbe “trip”y Aruba a bolbe keda den sin coriente cu a afecta produccion di awa tambe.
E forma cu Daniel Leo a reacciona y a tuma decision cu mester a tuma, a marca historia di Aruba cu lamentablemente no semper ta menciona e gran labornan di politiconan tambe, sigur na caminda pa e loke Aruba ta awe.
Economia di Aruba a scapa na man di Daniel Leo, cu a sorprende nos pa e forma cu el a soluciona e problema di awa y coriente cu e decision cu ta busca un planta nobo pa awa y coriente.
Awe un mundo cu ta na peliger pa motibo di cambio di clima, mester tuma e pasonan cu Daniel Leo a tuma den su tempo pa e ser humano por sobrevivi.
Actualmente mundo ta bolbe na e raiz di naturalesa, na e proteccion di naturalesa sin cual hende no por biba.
Balor nobo ta wordo duna na awa, na cuminda, cu ta base di felicidad di hende pasobra sin awa y cuminda, hende no por sobrevivi.
Den su tempo, na caminda pa Status Aparte, Daniel Leo tabata parti di un team, cu a traha sin sofisticacion, pa alcansa e Status Aparte di un Aruba cu un economia nobo a base di turismo cu na decada 80, a conoce un desaroyo campeon pa ora Lago a cera, a bira e herment pa mantene economia na bida.
Awe mundo ta duna Daniel Leo razon cu e maneho cu el a hiba, cu ta ehemplar pa e generacion di awe, cu mester biba cu cambio di clima y regreso na e balor di loke naturalesa ta entrega hende como condicion basico di bida.
Awe nos ta recorda Daniel Leo. Un gobernante Arubano, cu a uza formulanan Arubano pa habri caminda pa un futuro den cual hende ta bolbe campo, bolbe su origen, pa sobrevivi y crea un mundo nobo.
Den Daniel Leo nos ta aplaudi e baluartenan di ayera di Aruba cu a habri caminda pa awe Aruba por sigui cana riba e caminda nobo pa futuro!
