AruBIG ta ampliando...
ORANJESTAD (AAN): Durante un conferencia di prensa convoca Diamars mainta na sede di DVG den Caya ing. Roland Lacle, oficialmente nan a anuncia e maneho nobo di AruBIG cu lo bay drenta na vigor pa tur psicologo y enfermero tambe na Aruba.
Jurette Croes durante e conferencia di prensa, a introduci Jayburtt Dijkhoff, PhD kende ta Cabezante di Instituto di Calidad (‘Kwaliteitsinstituut’) kende a amplia riba e topico aki.
Nan lo tene un Town Hall Meeting riba Diabierna awor, y ta haci un yamada special pa e psicologonan pa atende esaki. E ta start 11;00 am na DVG mes den Caya ing. Roland Lacle.
Dijkhoff a enfatiza, cu den e Town Hall Meeting nan lo bay haci un presentacion riba loke ta e exigencianan nobo pa por traha na Aruba como psicologo. Nan ta haci esaki, como cu pa prome biaha den historia lo bay tin un Registro Nacional pa Psicologonan. Algo asina hamas a yega di existi, pues no tin un lugar caminda DVG por acerca tur psicologonan. Pesey mes ta bay cambia esey cu introduccion di AruBIG pa nan profesion.
Jayburtt Dijkhoff, PhD, como cabezante di Instituto di Calidad, a splica cu pa haci esaki mas claro posible, lo bay splica e procedimento pa tur psicologo na Aruba, riba loke ta AruBIG, kico ta e exigencianan nobo, y cu nan lo bay reconoce Hulanda, Canada, y Merca como diplomanan reconoci. Pero tambe lo bay duna espacio pa splica kico lo pasa pa e psicologonan cu por haya ‘vrijstelling’ (debi cu nan tin varios aña trahando den e profesion caba, sin un diploma di un pais reconoci). Pues toch nan por yega na remarca pa wordo registra.
Dijkhoff a indica cu lo papia pa e parti di grupo cu no ta haya un of otro forma di reconocemento, ki trayecto nan por haya of spera, y kico asina por haci pa e grupo aki. Lo bay papia tambe ki tipo di educacion adicional por wordo haci den futuro cercano pa nan tambe por yega na reconocemento.
Contrario cu Hulanda, AruBIG aki si lo bay reconoce e ‘basis psycholoog’, esta un psicologo cu a finaliza su Master’s na sea Hulanda, Canada of Merca, por traha na Aruba y registra den AruBIG. Na Hulanda esey no ta wordo permiti, aunke aya tambe ta trahando pa haci cambio na esey.
Den e Town Hall Meeting lo bay splica, kico tur un psicologo por haci, kico e specialistanan por haci, cua tipo di specialista lo wordo reconoci, y esaki ta importante pa nan haya e ‘feedback’ di psicologonan cu ta biba na Aruba.
Dijkhoff a enfatiza riba e importancia di ‘feedback’ cu DVG kier ricibi, pasobra enberdad nan ta bay tuma over varios di e reglanan cu ta valido na Hulanda, pero tin di tene cuenta loke ta e necesidad y contexto local. Pero pa haci esey, nan mester di feedback importante di e psicologonan riba Diabierna venidero.
Pesey nan ta haci un suplica pa nan por atende e presentacion aki, y invita coleganan pa asina nan haya feedback di importancia aki.
