Ciclo Basico Colegio Arubano a tene su anochi di informacion pa mayornan

ORANJESTAD (AAN): Recientemente Ciclo Basico Colegio Arubano a tene su anochi di informacion pa mayornan di e alumnonan cu a cuminsa Ciclo Basico 1 nivel Havo/Vwo na e aña escolar nobo.

   DIARIO a compronde cu riba e anochi informativo aki mayornan a ricibi un map di Colegio cu informacion importante tocante reglanan di scol y informacion tocante fechanan venidero cu mester tene na cuenta. E anochi a habri cu palabranan di bon bini na Colegio Arubano di e rector di Colegio Arubano Sr. Tim Croes y despues sigui pa un presentacion extenso di e conrectrice di Ciclo Basico señora Jennifer Arends-Reyes.

   Durante e presentacion a toca temanan importante pa mayornan ta bon informa y pa tene na cuenta cu ne, awor cu e alumno ta bira un alumno di scol secundario. Na final di e anochi a duna oportunidad pa haci pregunta y a clausura e anochi caminda mayornan a bay satisfecho y cla pa yuda prepara nan yiunan pa nan carera escolar na Colegio Arubano.

   Despues di dos aña di Ciclo Basico e alumno lo sigui su carera na Ciclo Avansa den klas 3 sea ta riba nivel di Havo of Vwo.

  Colegio Arubano ta keda un scol popular y reconoci den nos comunidad caminda generacionan di famia ta logra caba Colegio cu exito pa despues sigui nan carera ariba nivel avansa na Aruba, na Hulanda, Merca, Canada of den region y bira profesionalnan den comunidad.

   Colegio Arubano ta traha duro ariba e parti di formacion y guia di e hoben y ta percura pa keda actual den e curiculo y material cu e ta brinda na su alumnonan.

   Ciclo Basico durante aña ta percura pa su alumnonan tin varios actividad pa forma parti di dj’e banda di e programa escolar. Deseando tur e personal, y alumnonan hopi exito pa e aña escolar nobo cu hopi energia, positivo y animo.