Chauffeurnan cu no ta tende ambulance of ta riba nan celular tin biaha por causa peliger 

ORANJESTAD(AAN); Recientemente DIARIO a entrevista trahador di ambulance Jederick Peres, pa haya un impresion di e trabaonan cu personal di ambulance ta haci.

Peres tin 12 aña ta traha cu ambulance y el a splica cu e reto mas grandi cu e ta experiencia ta ora personanan tin problemanan medico y ora cu tin cu sali atende cu un accidente di auto.

DIARIO a puntra e trahador di ambulance tocante e retonan den trafico ora cu un ambulance sali riba caminda pa bay yuda hende.

El a splica cu en todo caso tin cierto ora cu ta druk riba caminda y personal di ambulance sa e ora ey cua ruta ta esun mihor pa coi pa yega tal caminda mas lihe posibel.

DIARIO a puntre tambe riba e cooperacion di automobilistanan riba caminda ora cu nan scucha e sirena di ambulance.

Peres a indica cu tin casonan unda cu un chauffeur por ehempel no a tende e ambulance y no ta wak de su spiel, of nan ta riba nan celular.

Pesey e conseho di Peres ta pa esnan tras di stuur paga mas tino y sigur no haci uso di celular ora cu nan ta core auto riba caminda.

Banda di esaki el a bisa cu ta importante pa tur hende bisti faha di seguridad y si tin mucha den auto cu ta menor di 12 aña di edad, nan tin cu sinta patras den e auto.

Chauffeurnan mester sigui haci bon uso tambe di nan spielnan di auto.