Gobierno y Merca ta firma MoU pa establece un Diplomatic Post Office na Aruba

ORANJESTAD (AAN): Diamars 20 di mei 2025, a tuma luga un encuentro importante entre Gobierno di Aruba y Gobierno di Estados Unidos. 

Durante e reunion, a firma un Memorandum of Understanding (MoU) pa fortalece e lasonan di cooperacion entre Aruba y Merca, specificamente pa establece un Diplomatic Post Office na Aruba pa agentenan Federal Americano den e facilidadnan di Customs and Border Protection (CBP).

            Prome Minister mr. Mike Eman y Minister di Finansa, Asuntonan Economico y Sector Primario mr. Geoffrey Wever a firma e MoU hunto cu Ramón Negrón, Charge D’Affaires na Consulado General di Merca na Corsou.

            E MoU aki ta e resultado di un periodo largo di cooperacion, consulta y negociacion entre Aruba y Merca. E esfuerso colectivo di e instancianan di Gobierno manera Departamento di Relacionnan Exterior, Departamento di Aduana, Inspectie Volksgezondheid Aruba hunto cu Consulado General di Merca, a conclui den e firmamento oficial di e MoU. Sr. Ricky Croes, Director di Aduana di Aruba, a indica cu di nan banda a duna tur cooperacion na CBP pa facilita e proceso di e Diplomatic Post Office aki na Aruba locual ta fortalece e lasonan cu nan coleganan Mericano.

            Ramón Negrón, Charge d’Affaires na Consulado General di Merca na Corsou a splica cu e Diplomatic Post Office ta sirbi e personal Mericano staciona pafo di Merca, y ta evita gastonan postal adicional pa e personal federal na Aruba. Nan por ordo via por ehempel Amazon sin cu esaki ta costa nan extra, compara cu si nan tabata na Merca. Ademas nan por ricibi nan medicamentonan for di Merca sin problema.

            Aruba su situacion ta unico mirando cu nos tin operacionnan di CBP sin consulado Mericano riba su teritorio. E Diplomatic Post Office lo yuda mehora eficiencia di servicionan postal pa oficialnan federal di CBP y ta fortalece e sinergia cu un di nos partnernan strategico mas importante.

            Prome Minister mr. Mike Eman a indica cu “poco Pais den mundo tin un CBP, y si wak den Caribe mes, ta un of dos tin, y esey kiermen cu Merca a haci un excepcion pa Aruba. CBP na Aruba ta un proyecto di Prome Minister Henny Eman d.f.m., cu a trece CBP Aruba y a desaroya esaki den un di e pilarnan importante den nos turismo. Esaki ta refleha e relacion special cu tin pa hopi aña cu Merca y esey ta algo cu mester cultiva y traha riba dje”.

            CPB ta importante pa turismo di Aruba cu ta depende pa gran parti di Merca, sea ta pa su turista of productonan cu ta importa. “Mantene un bon relacion cu Gobierno Mericano ta importante pa stabilidad di e economia di Aruba”, Minister Geoffrey Wever a indica.  Segun Minister Wever, “e firmamento di e MoU pa e Dimplomatic Post Office, ta cumpli cu peticion di Gobierno Mericano pa facilita e posicion di e personal di CBP cu ta traha na Aeropuerto den Pre-Clearance. Merca ta un partner solido di Aruba.

            Segun Prome Minister Eman, “E firmamento di e MoU aki ta enfatisa e cooperacion entre Aruba y Merca y ta spera cu dentro di corto por firma tambe e extension di e acuerdo di CBP pa por tin e servicio importante aki pa hopi aña mas na Aruba”.