Mester busca alternativanan pa ultra dependencia di Merca y Hulanda
- Politica mester adapta su mes na e realidad di mundo di awe y mañan
- Awe prioridadnan y diseño di liderazgo mester bandona museo di pasado
ORANJESTAD (AAN) Na e momentonan aki ta un hecho conoci, cu mundo ta pasa den un fase di transicion, cu ta implica introduccion di cambionan grandi riba tur tereno.
Historia humano ta marca pa revolucion cu ta haya atencion pa e resultadonan impactante y sensacional cu e tin mientras evolucion, cu ta e desaroyo silencioso, no ta goza di mes interes.
Hende tin un amor mas grandi pa sensacion cu pa e parti mas importante, cu ta desaoroyonan serio, cu tga exigi adaptacion programa y planifica di un comunidad.
E hecho cu politiconan mester di voto ta haci cu un parti grandi di politico ta asumi un posicion di revolucion, di posicion drastico den cual nan por hunga Lion King, pero cu na final pa e falta di planificacion, ta hinca e pais den aventura.
Accion revolucionario riba tur tereno, ta asunto di un rato y falta di planificacion debido pa no papia mes di ausencia di un bon plan di organisacion, ta algo pa un rato y ta wordo sigui pa un temporada cu mester baha hende for di nubia y pone tur cos den contexto real.
Aruba durante ultimo añanan, a conoce un reorganisacion gubernamental, cu na man di Reino Hulandes, a cuminsa na e base di tur loke hende kier realiza, cu ta creacion di e fondonan necesario pa hende y un pais sobrevivi exigencianan basico.
Con mester maneha fondonan di Pueblo, tabata e exigencia mas importante pa por a habri un caminda nobo pa futuro.
Manera semper DIARIO a splica, awor e parti mas importante ta bini, cu ta e forma cu ta pone logronan den practica, a base di planificacion debido, adaptacion na cambionan y exigencianan mundial y mantencion di reservanan necesario pa por atende cualkier emergencia cu mundo por produci.
Cada epoca den historia, tin su propio exigencianan y bon gobernacion ta implica cu mientras ta ehecuta loke ta necesario pa maneho directo, ta adapta na desaroyo constante di un mundo cu ta parti di un univeriso cu no conoce descanso.
Liderazgo ta encera e capacidad pa un lider no keda pega den museo di pasado, pero tin e dinamismo contagioso di un mundo den accion constante cu ta exigi bista riba futuro.
Liderazgo mester wordo compara cu un chofer, cu ta maneha un auto pa yega na un lugar pero a percura pa e auto ta den condicion pa sirbi como tranporte adecua, ta haci uzo di un mapa pa mira si e ta sigui e ruta corecto mientras e ta bon prepara pa enfrenta su destinacion.
E exigencianan aki mas cu nunca ta presenta nan mes na Aruba, cu un economia y asina un comunidad dependiente di loke ta pasa mundialmente.
E programa pa futuro cu comunidad mundial actual ta entrega Aruba, ya por conta cu un base di solidez financiero cu a wordo alcansa durante ultimo añanan den tremendo cooperacion fructifero entre Aruba y Reino.
Aruba mester di e solidez financiero cu el a crea, den un mundo den cual seguridad ta un factor perdi.
Instabilidad mundial ta aplaudi e forma cu Aruba a crea un base financiero nobo, pero awor ta exigi un maneho den cual Aruba por enfrenta cambionan enorme na forma autonomo.
Aruba no por basa su mes mas riba e hecho cu tin Reino pa asistencia cu placa ni cu Merca ta keda e baranca economico y productor di mercancia importante pa Aruba.
Na e momentonan aki, creacion di reserva ta bira mas importante cu nunca ya cu mester ta prepara pa un situacion mundial serio, cu gritonan di guera.
Autonomia a entrega su exigencia pa un base financiero solido, cu cual a wordo cumpli, y autonomia awor ta exigi pa Aruba prepara un plan di diversificacion.
Aruba no por bolbe na museo di pasado, pero mester subi e vuelo pa futuro den cual tur desaroyo di ultimo temponan, ta resulta den un epoca nobo, cu mester di bista moderno, cu conocemento di interaccion internacional, pa atende cu retonan moderno.
Situacion mundial ta sumamente preocupante. Pero no ta extra terestre, pero hende mester a crea e situacion actual, cu ta exigi henter mundo adapta su mes, crea horizontenan nobo, cu hasta naturaleza ta exigi den cambio di clima!
Aruba a crea un base financiero durante ultimo añanan, cu ta permiti e pais atende cu exigencianan di cambio mundial riba tur tereno, cu lo tin efecto pa Aruba tambe.
