Charlene Nectar sosteniendo alumnonan di Colegio EPI cu comunicacion di leadership

ORANJESTAD (AAN): Colegio EPI a disfruta di henter un siman di siñamento hunto cu Charlène Nectar, doño y Managing Director di U-Spark People Management & Development Consultancy.

   El a haci su mes boluntario pa e mision, cual e ta considera algo sagrado, dicidiendo di ta parti di Colegio EPI su Leadership Program, na etapa final di e aña escolar actual.  E siman aki a worde pasa ta comparti conocemento tocante Leadership Communication.

   “E manera cu ami ta wak e,” Nectar ta bisa, “Mi a pasa cinco dia den klas cu futuro liders den industria di hospitalidad, y e tabata un experiencia tremendo. Mi por claramente wak e potencial ta briya den nan, cu coaching y direccion, nos a logra hopi.”

   Colegio EPI Hospitality & Tourism a conecta cu Nectar, puntrando e pa e forma parti di e curriculum planea, cual el a bay di acuerdo mesora. “Ami ta kere cu como compania nos tin e responsabilidad pa contribui na e educacion y desaroyo di e studiantenan ki ora cu ta posibel. Specialmente mirando cu industria di hospitalidad ta e yabi pa nos economia, y e scol tin un lugar special den mi curason. No tabata tin ningun otro posibel contesta cu SI,” el a agrega.

   Den total, 48 studiante a participa activamente den e Topic Presentations y Work Groups. Tur studiante a haya punto riba nan trabao, cual e topiconan a varia entre importancia di comunicacion interno den industria di hospitalidad, na con cultura organiza ta impacta comunicacion den area laboral.

   E studiantenan tambe a revisa e impacto di liderato den comunicacion, y rol di comunicacion den un ambiente laboral diverso. Nan a discuti tambe e impacto di participacion di empleado den comunicacion dentro di organizacionnan, y mehoracion di comunicacion entre empleadonan di multi generacion. Nan a traha den grupo y scucha charlanan, riba e ultimo dia nan a brinda tremendo presentacionnan integra cu nan conocemento nobo.

   Miembronan di e grading committee a inclui Charlène Nectar como cabes di e comision y instructor, y invitadonan special Michiko Eman-den Hartog, Human Resources Manager na Bucuti & Tara Beach Resort. Eman a worde invita pa e presentacion final hunto cu Nectar y Lucie Kelly, docente di Ingles y Public Speaking & Critical Thinking na Colegio EPI.

   Nectar, un Performance Coach cu ta target Strengths & Results ta orguyoso di por ta parti di Colegio EPI Hospitality & Tourism Leadership Program. E ta stima duna back na su comunidad. Semper siñando algo nobo, e tin pasion pa comparti su conocemento y experiencia cu organizacionnan y individuonan, den e caso aki e scol EPI, yudando nan concentra den e forsanan di e studiantenan pa stimula nan desaroyo personal y excelencia den grupo.

   E tabata realmente un siman transformativo pa nan y nan coaches. “Nos tur a crece como profesional e siman aki, Nectar ta agrega.

   Un danki special ta bay na Charlotte Ponticorvo, Unit Manager Colegio EPI Hospitality & Tourism, hunto cu su team pa e gran oportunidad.

   Nectar tin mas cu 20 aña di experiencia den Management & Advisory den Recursonan Humano y Operations. Su compania, U-SparkPeople Management & Development Consultancy ta traha cu clientenan den e sectornan Profit y Non Profit di Aruba y rond Caribe.