Parlamentario Alvin Molina (MEP):
ORANJESTAD (AAN): Na Aruba tin bon oportunidad pa comerciantenan por inverti den un negoshi y asina eleva nos economia. Specialmente San Nicolas lo a ricibi su debido atencion durante e gobernacion actual. E realidad ta cu tin hopi ideanan, business plans, inversionistanan cla pa ehecuta, cla pa crea empleo, pero toch mucho no ta pasa.
Mi ta gradicido na minister Dangui Oduber y tur cu ta colabora cu nos turismo pa e sigui crece y recupera, pero San Nicolas falta hopi desaroyo pa turismo por crece na su maximo potencial. No tin suficiente negoshi pariba di brug pa por duna servicio na e cantidad di turista cu por spera. Tin hopi posibilidad pa restaurant, hotel chikito, condominium, casino, establecimentonan pa musica/arte/deporte/actividadnan social y cultural.
Pa nos diversifica nos economia, tin varios plannan agricultural cla pa wordo ehecuta; cla pa crea empleo, eleva food security, baha importacion di cuminda y eleva nos economia. Tur e plannan aki mester di tereno, anto eynan e proceso ta tranca.
Hopi hende local ta frustra di tanto wardamento, hopi inversionista ta cansa y ta dicidi di bay inverti na otro pais. Esaki pasobra nos departamento DIP no ta funcionando manera mester ta, no ta dunando Aruba e servicio cu e merece. Un ehempel ta Kamini’s Kitchen na Lago Heights, un restaurant cu durante añanan a prueba su mes di duna un servicio excelente na nos hendenan local y turistanan. Kamini tin un plan pa expande e negoshi y brinda un experiencia mas great ainda pa un y tur. Lastimamente Kamini ta wardando hopi aña caba pa por logra e pida tereno necesario aki.
Como presidente di comision fiho di infrastructura mi a cuminsa yama reunionnan cu DIP. E prome cu a logra tabata na april y DIP a elabora riba ROP/ROPV. E siguiente reunion, cu lo ta esun importante, ta e plan cu mando tin con pa sanea e problemanan cu tin na DIP, ki vision tin pa despues di tanto aña di decadencia lo por cuminsa brinda un servicio di mas calidad na pueblo di Aruba y ki accion ta wordo tuma pa mehora e servicio.
Varios caso ta andando den DIP, hasta hendenan ta wordo deteni, cu ta causa un inseguridad bou e ambtenaren na DIP y tambe extra trabou pa DIP. Mi a haci un peticion pa toch busca un manera pa sigui trata peticionnan cu lo yuda eleva nos economia. Pesey mi ta agradecido na nos minister di infrastructura pa su esfuersonan pa institui un team intern special pa peticionnan comercial.
Mi ta di opinion cu DIP lo mester bay colabora miho cu otro departamentonan. Por ehempel, den e caso di agricultura, cu Santa Rosa cu ta e autoridad riba e tereno aki. Si nos echt kier pa desaroya San Nicolas como un centro economico di Aruba, San Nicolas MESTER haya atencion y prioridad pa cu peticionnan comercial.
