Yvonne Lee-Perez ta indica
ORANJESTAD (AAN); Manera DIARIO a trece dilanti, e luna aki lo sigui cu e Encuesta encuanto Forza Laboral (EFL) na Aruba. E ta wordo organiza door di Oficina Central di Estadistica, hunto cu Departamento di Labor y Investigacion (DAO), hunto cu Banco Central di Aruba.
Yvonne Lee-Perez di Departamento DAO a indica cu e encuesta aki di berdad ta hopi importante pa asina nan Departamento tin un mihor bista di e imagen di trahadornan na Aruba.
Cu e encuesta aki, DAO lo ricibi suficiente dato pa por sa con e desaroyo ta riba mercado laboral, y realmente pa asina tur otro instancia sa con e isla ta para riba mercado laboral, con e desempleo ta, con hopi e grado di empleo ta, y e datonan aki ta yuda pa guia, vigila, y evalua maneho cu tin di pa cu mercado laboral.
E cifranan obteni di e Encuesta lo wordo reparti pa tur instancia cu ta encarga pa formula futuro di e isla, y pa tin un mihor bista riba e manpower cu Aruba ta dispone di dje. Pasobra instancianan sa ricibi hopi pregunta encuanto mercado laboral, y no ta djis dato cu Gobierno of Ministro kier sa. Pasobra pueblo en general tambe ta desea di tin e informacion ey.
Yvonne Lee-Perez a indica cu e datonan aki ta hasta wordo poni riba Internet pa asina tur hende tin acceso na dje, incluyendo studiantenan. E topico di mercado laboral ta uno dinamico cu semper ta cambia, pues ta importante pa e cifranan ta disponible. Esey ta loke DAO ta comparti tambe cu e.o. DPL y demas partnernan cu ta specializa den Labor, y cu kier haya dato up-to-date di con e mercado ta hinca den otro, y merece di haya e informacion di mas nobo.
Segun Lee-Perez, e nucleo di e Encuesta di Forza Laboral ta pa haya sa e taza di desempleo, e taza di empleo, y e cantidad di hende cu ta inactivo. Esey ta e tres grupo principal, y tur hende tin di cay bao di un categoria.
Fuera di esey, e Encuesta ta suministra informacion y caracteristica extra di tur loke por a puntra durante e entrevista, ta dunabo mas informacion cu bo por analiza un poco mas di e gruponan aki.
Acerca ta bin cu na DAO mes ta usa otro fuente di dato tambe pa asina tin mas detaye di e mercado laboral na Aruba.
E Encuesta ta un ‘moment opname’ di situacion awor na Juni 2022, y ta usa esun di November 2021 tambe. E meta di berdad ta pa midi e situacion mas cu djis 1 biaha pa aña.
