Certificado na e hobennan pa curso di Kid$preneurs na Scol Basico di Washington

ORANJESTAD (AAN):  Minister di Asunto Economico, Geoffrey Wever, tabata tin e grato placer di por entrega certificadonan pa hobennan cu a participa y termina cu e curso Kid$preneurs.

E biaha aki Kid$preneurs a tuma luga na Tra’i Merdia di Scol Basico na Washington.  "Kidspreneur$" ta un proyecto di Directie Economische Zaken su departamento di IDEA, caminda ta siña hobennan ya for di un edad jong con pa desaroya un plan for di un idea, y un business for di un plan. Asina ta instala conocemento y bon practica ya for di un edad hoben pa nos futuro generacion.

   Sea den nan futuro nan lo escohe pa bira empresario of no, ta spera cu e curso di Kid$preneurs por yuda inspira algun mente hoben pa nan haci cualkier tarea cu nan lo kier eherce. “E futuro briyante di Aruba ta den man di nos hobennan, y nos mester sigui cu esfuerso pa sostene nan den nan soñonan, y inspira nan pa ta e miho persona nan por ta, eliminando cualkier barera na nan creatividad”, minister Wever ta enfatisa.

   Minister Wever ta manda un palabra di gradicimento pa DEACI y specialmente pa su unidad di IDEA cu ta contribui alma y cuerpo pa logra haci Kidspreneur$ posibel un bes mas.