ORANJESTAD (AAN): Un persona cu hendenan a describi como un dama di bon curazon,
ta e persona kende riba Dialuna a acudi na oficina di Lotto na Playa pa reclama su premio miyonario di Lotto 5.
Manera ta conoci, Diaranzon siman pasa e sorteo di Lotto 5 a produci e numbernan 09, 10, 14, 20, y 29. Solamente un ticket bendi na Aruba, na e negoshi di Lucky Numbers den Arendstraat a resulta di tin e combinacion perfecto.
A dura un par di dia, pero Dialuna si e ganadora a presenta hunto cu su famia na oficina di Lotto na Playa. Señora Iris a yega y a entrega e ticket ganador na e funcionario di Lotto. Nan a revisa e ticket pa check si el a pone su firma na e otro banda di ticket, hunto cu e number di su cuenta na banco.
Ora di scan e barcode, e computer a confirma cu señora Iris a bira e ganadora di 2.200.000 Florin cu wega di Lotto 5.
Iris a bisa nan, cu e numbernan ganador riba su ticket tabata numbernan traha cu e fecha di nacemento di su yiunan. Pues un combinacion perfecto pa e señora aki cu nan ta describi como un hende di bon curazon y bon mereci pa e premio.
Asina nan a sigui cu e proceso pa transferi e premio electronicamente pa su cuenta di banco. Funcionarionan di Lotto a informa Iris, cu el a bira e prome ganadora cu a sobrepasa e barera, y a gana mas cu 2 miyon Florin cu Lotto 5. Palabra di pabien na señora Iris cu su premio.
