ORANJESTAD (AAN): Riba 20 di Juli 2023, Ministernan y parlamentarionan a atende e ceremonia protocolar en conexion cu 213 aña di Independencia di Colombia.
Un bunita ceremonia a tuma luga na Plaza Libertador Simón Bolívar. Consul di Colombia, Sr. Gustavo Serrano Amaya, Vice Prome Minister Ursell Arends, Minister Endy Croes, Minister Glenbert Croes y Presidente di Parlamento, mr. Edgard Vrolijk, a hiba palabra na e ocasion special aki.
Sigur bunita palabranan den e diferente discursonan a keda presenta. Sigui pa presentacion di ofrenda floral pa e dignatarionan. Minister Geoffrey Wever, Parlamentario Sra. Shailiny Tromp-Lee y Sr. Hendrik Tevreden y director di diferente departamento di gobierno tambe tabata presente na e mainta special aki. Nos Gran Libertador Betico Croes a bisa: “Arubiano no ta solamente esnan cu a nace akinan, sino tur cu a haci Aruba nan hogar”. Masha pabien na tur Colombiano rond di mundo.
Na tur Colombiano residencia aki na Aruba cu a yuda cu nos desaroyo, progreso y a contribui na e bienestar di nos pais Aruba un palabra di gratitud for di profundo di nos curason.
https://diario.aw/categories/noticia/general/ceremonia-protocolar-pa-conmemora-dia-di-independencia-di-colombia#sigProIdec4695f4f8
