Ceremonia na Aruba Huis pa instala ‘Studenten Commissie Aruba’ oficialmente

ORANJESTAD (AAN): Informacion for di Hulanda ta indica cu na Aruba Huis (‘Gabinete di Aruba’) a tuma lugar un ceremonia pa instala oficialmente e prome miembronan di e “Studenten Commissie Aruba” (SCA).

Esaki a sosode den presencia di Prome Minister demisionario Evelyn Wever-Croes, Minister Plenipotenciario demisionario Ady Thijsen, director di Gabinete di Aruba Joselin Croes, mentornan, representant nan di ministerio di OC&W y personal di Aruba Huis.

   E “Studenten Commissie Aruba” ta consisti di 7 miembro kendenan a keda apunta despues di un procedura di solicitud. E miembronan – reparti den diferente region - ta Roderick W. Atmowirono, Chloe Manon Ruiz, Alejandra Mc Bene Courtar Moreno, Nathan Perez, Emile Lambrinos, Tai Kon Ashley Trimon-Lee, Delaiah Edilianne Tromp y nan ta bin di e region nan di Utrecht, Nijmegen, Arnhem, Limburg, Rotterdam, Den Haag y Leiden.

   Prome cu e ceremonia e shete miembronan a firma e acuerdo di e SCA y despues durante e ceremonia special a keda instala. Na e ocacion aki Minister Plenipotenciario demisionario Ady Thijsen a tene un discurso unda e mandatario a acentua e importancia di tin un organisacion di studiante cu conoce e mundo estudiantil y asina por ta duna aviso na Aruba Huis. Minister Thijsen a bolbe ripiti cu pa Aruba ta importante cu nos studiantenan regresa Aruba.

   Director di Gabinete di Aruba Joselin Croes a introduce e miembronan di e SCA cu un storia chikito di nan trayectoria. E miembronan despues a duna un splicacion di nan motivacion pa a solicita pa ta parti di e SCA y kico ta nan idea y plannan pa e comunidad estudiantil Arubiano. Senora Croes a bisa cu tur esaki ta posibel danki na e trabao duro di e departamento di Enseñansa di Gabinete di Aruba en especial Ivonne Navas y Jennifer Sneek.

   Finalmente Prome Minister a duna un palabra di gradicimento na e miembronan pa a dicidi di ta parti di e SCA aki y ta sigur cu nan trabao lo ta na beneficio di studiantenan Arubiano na Hulanda y a desea tur e miembronan di SCA hopi exito

   E idea pa lanta un “Studenten Commissie Aruba” ta e resultado di e diferente sesionnan di brainstorm cu a tuma lugar y encuestanan haci bou di studiantenan. Aki a sali afor cu e deseo di e studiantenan ta pa wordo scucha y pa tin mas voz riba e maneho, plannan y guia di studiantenan Arubiano na Hulanda. Meta di SCA ta pa duna conseho na Gabinete di Aruba riba asuntonan cu ta di interes pa studiantenan Arubiano na Hulanda. Alabes SCA lo yuda pa fortifica e lasonan entre Gabinete di Aruba y studiantenen. Tambe SCA lo yuda Gabinete di Aruba cu idea pa encuentronan, workshops, jobfairs y duna informacion nan studiantenan.

   E miembronan di e SCA a keda nombra pa e periodo di 7 di Februari 2025 te cu 31 di December 2026. Despues lo start un procedura di solicitud nobo pa apunta e miembronan pa e siguiente periodo di un aña.  E potretnan ta cortesia di Arubahuis.