Edward Maduro, lider di SADA:
ORANJESTAD (AAN) – Edward Maduro, Presidente di Sindicato di Aduana (SADA), a duna di conoce den entrevista cu DIARIO, cu desde aña 2017 cu nan a rond af e Functie en Salarishuis, a keda palabra cu inmediatamente lo bay forma un comision cu lo traha riba e format, unda ta bay delinea cuanto hende mester di berdad.
Maduro a señala cu desde e tempo ey nan ta core cu un falta di personal basta grandi den dienst, y esey ta biba vooral den e periodonan mas druk di e aña, por ehemplo fin di aña, cu e comerciantenan ta keha.
“E ta jammer pa bisa pero e maneho tabata desastroso, si bo sa cu bo ta corto di personal y cu na fin di aña e comerciantenan ta bin bati na bo porta, y bay keha tur caminda cu Aduana no tin personal pa controla e containernan, etc., y den comunidad tambe bo por wak con nan ta ataca e duanero pero e ta un mal maneho pasobra si bo sa cu tin falta di personal bo mester a zorg pa drecha esey”, segun Edward Maduro.
E lider sindical ta haya lamentable cu SADA a purba di sinta cu e minister cu tabata encarga e ultimo ocho añanan aki, pa forza pa bin cu e format pa trece e puntonan specifico na unda mester di hende. El a subraya cu na aeropuerto tin falta di personal y tambe na WAF pero gobierno no kier atende cu esey.
El a agrega cu como cu e leiding aki ta un dienst cu ta prefera pa laga e duanero “mula” (mata su curpa) haya sosten di otro seccionnan , locual den pasado tabata sosode, esaki no ta e caso e aña aki.
“Manera dos hende bira malo of un a bay cu vacancy, tur cos ta bruha; diripiente e reki den supermercado a bira bashi, pero ta cosnan cu nos no por deal cu ne, y mi a señala esaki na varios ocasion na e minister. Y atrobe, na spera di e gobierno nobo nos ta spera cu pronto nos lo haya un audiencia cu e mandatario nobo, pasobra ta cosnan cu a keda drumi pa hopi aña. Nos no por sigui drumi riba dje, pasobra Aduana ta e di dos cu ta trece hopi placa na gobierno, anto si bo no tin e tools, no tin e manpower bo controlnan ta bay atras. Nos lo pone e mandatario na haltura pasobra lamentablemente cu e minister cu a baha nos no a logra hopi”, Edward Maduro a enfatiza.
