Ceremonia di presentacion oficial di Gabinete Wever-Croes II

ORANJESTAD (AAN): Despues di huramenta Ministernan di Gabinete Wever-Croes II cerca Gobernador Interino, señora Yvonne Laclé-Dirksz

a tuma lugar un ceremonia di presentacion oficial di Gabinete Wever-Croes II, dilanti di Bestuurskantoor.

Hoben Richanel Statie a duna un discurso hopi bunita y conmovedor pa habri e ceremonia. Prome Minister Evelyn Wever-Croes a hiba palabra y a bisa cu nan ta cla pa cuminsa traha riba retonan grandi cu nan tin nan dilanti.

Prome Minister a indica cu Gabinete Wever-Croes II ta forma pa un coalicion entre partidonan MEP y RAIZ. Despues di un proceso di eleccion adelanta, Aruba a vota pa un coalicion pa sigui enfrenta e retonan cu Aruba ta pasando aden. E coalicion a dicidi di reuni cu e cantidad mas grandi di stakeholders cu tabata posible, pa asina por scucha kico ta biba den comunidad y kico ta e retonan cu cada un ta enfrenta, pero mas importante, pa Gobierno por tene cuenta cu esaki mientras nan ta haci nan esfuersonan pa sali di e pandemia.  Segun Prome Minister, loke mas a hala su atencion durante e reunionnan ta e optimismo, speranza y deseo di cada un di e stakeholders pa ta parti di e solucion. "Aruba mester di nos tur. No ta solamente e Ministernan, e ta un union entre tanto sector publico y sector priva, Gobierno y Parlamento, tanto coalicion y oposicion, den momentonan aki, Aruba mester di nos tur!" Prome Minister a enfatiza.

Coalicion kiermen cu cada partido lo sirbi y traha cu sinceridad, cu transparencia, colegialidad, creatividad, pasion, disciplina y integridad pa logra lo maximo pa Aruba. Partido MEP y Partido RAIZ ta cla y a tuma e timon di gobernacion den un lama turbulento, pero cu fe y confianza cu nos lo sali afo.

Prome Minister a presenta oficialmente Gabinete Wever-Croes II:

𝗦𝗿𝗮. 𝗘𝘃𝗲𝗹𝘆𝗻 𝗪𝗲𝘃𝗲𝗿-𝗖𝗿𝗼𝗲𝘀 𝗱𝗶 𝗣𝗮𝗿𝘁𝗶𝗱𝗼 𝗠𝗘𝗣: Asunto General, Innovacion, Organisacion Gubernamental, Infrastructura y Planificacion Teritorial y Prome-Minister.

𝗦𝗿. 𝗨𝗿𝘀𝗲𝗹𝗹 𝗔𝗿𝗲𝗻𝗱𝘀 𝗱𝗶 𝗣𝗮𝗿𝘁𝗶𝗱𝗼 𝗥𝗔𝗜𝗭: Integridad, Naturalesa, Transporte y Cuido di Grandinan y Vice Prome Minister.

𝗦𝗿𝗮. 𝗫𝗶𝗼𝗺𝗮𝗿𝗮 𝗠𝗮𝗱𝘂𝗿𝗼 𝗱𝗶 𝗣𝗮𝗿𝘁𝗶𝗱𝗼 𝗠𝗘𝗣: Finansas y Cultura y Segundo Vice Prome Minister.

𝗦𝗿. 𝗚𝗲𝗼𝗳𝗳𝗿𝗲𝘆 𝗪𝗲𝘃𝗲𝗿 𝗱𝗶 𝗣𝗮𝗿𝘁𝗶𝗱𝗼 𝗥𝗔𝗜𝗭: Asunto Economico, Comunicacion y Desaroyo Sostenibel.

𝗦𝗿. 𝗥𝗼𝗰𝗰𝗼 𝗧𝗷𝗼𝗻 𝗱𝗶 𝗣𝗮𝗿𝘁𝗶𝗱𝗼 𝗠𝗘𝗣: Husticia y Asuntonan Social.

𝗦𝗿. 𝗘𝗻𝗱𝘆 𝗖𝗿𝗼𝗲𝘀 𝗱𝗶 𝗣𝗮𝗿𝘁𝗶𝗱𝗼 𝗠𝗘𝗣: Enseñansa y Deporte.

𝗦𝗿. 𝗚𝗹𝗲𝗻𝗯𝗲𝗿𝘁 𝗖𝗿𝗼𝗲𝘀 𝗱𝗶 𝗣𝗮𝗿𝘁𝗶𝗱𝗼 𝗠𝗘𝗣: Labor, Integracion, Energia.

𝗦𝗿. 𝗗𝗮𝗻𝗴𝘂𝗶 𝗢𝗱𝘂𝗯𝗲𝗿 𝗱𝗶 𝗣𝗮𝗿𝘁𝗶𝗱𝗼 𝗠𝗘𝗣: Salud Publico y Turismo.