Na entrada Gobierno Wever-Croes 2 e proyecto Eagle LNG ta central - *Temporada friu na Europa y Merca ta revela importancia di gas pa mundo - *Negoshi den gas lo sigui crece sigur te na 2025 na nivel mundial
ORANJESTAD(AAN)—Dos proyecto sumamente importante pa Aruba, ta loke DIARIO tin riba su lista di desaroyonan cu mester sigui vigila na momento cu Gabinete Evelyn Wever-Croes 2 ta haci su entrada na Aruba.
E crecemento economico di e pais mester garantisa e base pa resultadonan positivo pa e periodo di gobernacion di e gabinete nobo, cu a asumi poder ayera.
Te awor, e hecho cu por baha prijs di awa na Aruba si e proyecto di gas Eagle LNG bira realidad, a haya tur atencion.
Informacionnan cu DIARIO a acumula di desaroyonan mundial, awor ta pone e actividad economico y e resultadonan financiero cu e proyecto Eagle LNG lo tin pa Aruba central.
Segun informacionnan ricibi, e demanda mundial pa gas ta asina halto, cu paisnan Europeo ta na careda debi na un aumento pisa di prijs cu esaki lo trece cune.
E cantidad di gas cu ta alcansa casnan di famia y empresanan na Europa, no ta cumpli cu e demanda y actualmente mundo productor y di distribucion di gas ta na careda pa entrega di gas, cu sigur te 2025 lo marca negoshi internacional.
Informacionnan acumula pa DIARIO ta indica cu na 2021 e demanda pa gas natural lo subi cu 3.6 porciento y cu te cu 2025 por spera cu e ta sigui subi cu 1.7 porciento.
Noruega y Rusia cu ta e productornan mas grandi di gas na Europa ta na careda pero tambe tur otro pais na mundo cu ta produci y distribui gas.
Mientras e temporada friu ta bati na porta na paisnan di Europa entre otro, companianan di gas mundialmente ta mira un crecemento enorme pa negoshi.
Manera ta conoci, e desaroyonan di clima ta haci cu refinerianan di petroleo lo bay adapta nan mes na e exigencianan di cambio di clima cu ta exigi pa adapta e forma cu ta refina petroleo.
DIARIO ta en busca di mas informacion tocante Quanten Consortium Aruba, cu ta e proyecto pa trece un refineria adapta na e exigencianan nobo di cambio di clima na Aruba.
Te awor tur informacion ta indica cu e proyecto cu ta wordo respalda dor di Gobierno Mericano, lo continua y cu entrada di Gabinete Evelyn Wever-Croes 2, DIARIO ta pendiente informacion riba e proyecto aki.
Mientrastanto informacion ta indica cu Eagle LNG na Juli a habri un centro pa distribui gas na Antigua y cu negociacionnan pa e proyecto a continua na Aruba.
Distribui gas den Caribe, caminda demanda pa gas tambe ta sigui crece, ta un bon negoshi pa Aruba segun tur informantenan di DIARIO cu lo sigui e desaroyonan mundial riba tereno di energia cu ta nifica tambe pakico ta importante pa Aruba tin su propio centro cu por baha prijs di produccion di energia na momento cu demanda di gas ta pone tur prijs mundial subi.
