Centro Kibrahacha cu bunita celebracion Diabierna pa honra Dia di Himno y Bandera

*Dialuna nan lo ta na Museo Arkeologico tambe cu expo di pintura

ORANJESTAD (AAN)—Lucia Hoek, Coordinador di Actividadnan na Centro Kibrahacha, a celebra Dia di Himno y Bandera riba Diabierna 15 di Maart, mirando cu riba e fecha oficial, 18 di Maart, nan ta celebre na Museum.

Nan a habri mainta cu e Himno Nacional Aruba Dushi Tera, y a sigui cu nan grupo di Cuarta cu a interpreta algun melodia di antaño, y despues a sigui un grupo di baile. Atardi nan a ricibi un grupo di 25 mucha di Dizahs’s Crèche & Play Garden, cu a dedica algun cancion pa e adultonan mayor.

Lucia Hoek a gusta y gradici e gesto aki pasobra e ta un bon conexion ora adulto mayor y mucha chikito ta bin hunto. 

Despues a sigui balia cu e grupo di Robert y asina a cera e actividad di Diabierna, pero a haci un invitacion pa pueblo en general, pa Dialuna 18, Dia Nacional di Himno y Bandera pa ta na Museo Arkeologico Arubano, pasobra eynan Kibrahacha lo tin presentacion di un otro grupo di Cuarta, cu lo canta algun cancion di Aruba, y tambe nan grupo di baile ta bay brinda nan piezanan masha bunita, y apart di esey nan tin un exposicion di pintura unda lo tin mas di 25 cuadro na benta, traha pa nan adultonan mayor mes y hopi bon prijs. Un invitacion pa henter pueblo pa bishita Museo Arkeologico y coopera cu Club Kibrahacha.