Dialuna 18, Dia di Himno y Bandera:
ORANJESTAD (AAN)—Den entrevista cu DIARIO, Marguerita Wever, Hefe di Departamento Educativo di Museo Arkeologico, a indica cu nan ta habri nan porta un biaha mas, riba Dia Nacional di Himno y Bandera, den horario di 10’or di mainta pa 3’or di atardi.
Pa e ocasion aki nan ta haci’e un tiki mas largo pasobra tin hende cu ta cana rond y pa ultimo ta pasa na Museo y pesey tin un ora extra pa ricibi bishitantenan.
“E aña aki nos ta bay tin un programa hopi varia, hunto cu Club Kibrahacha nan ta bay tin un presentacion di Cuarta y Canto, nan ta bay bin cu un exposicion di cuadro. Ta bay tin un tayer di trabao (obra di man) cu e artista Ruth Geerman Mariano, cu ta un tiki mas simpel cu e tayernan di trabao cu e ta duna normalmente, pa mucha, hoben y adulto cu kier participa, haya un idea kico nan por haci cu e materialnan cu e ta traha cu ne. E ta encera un prijs simbolico.
Lo tin tambe un Bazaar cultural, cu diferente artesano cu ta traha producto na man y cu ta bay bende algo den e hardin di Museo.
Bar y cushina lo ta hopi bon surti. Banda di snacks y cuminda crioyo ta bay tin sopi, Chuchubi Bakes lo ofrece cuminda vegetariano liber di sucu y gluten, specialmente pa hendenan cu kier come algo mas saludable, of cu ta sensitivo pa gluten.
Lo tin un kids corner pa muchanan por relaha un rato, Rebecca Rose Production ta bay estrena e siguiente mini- documentarionan cu el a traha en conexion di e exposicion nobo cu ta den desaroyo, na unda por wak un parti di dje den e museo mes.
El a traha mini documentarionan tocante e historia di e edificio monumental como tambe di e famia cu tabata biba eynan. Marguerita ta invita pueblo pa observa esaki, sinta den e auditorium cu airco, y wak’e comodamente.
Ademas tin presentacion audiovisual nobo di Natusha Croes, y e instalacion, tambe nobo, di Sharelly Emmanuelson. Entrada ta gratis. E entrada oficial ta keda den cas Dun Dun, pues den e edificio berde, pero pa e fluho di bishitante lo habri e ex-fruteria tambe. E ta invita henter pueblo pa pasa na Museo, come un dushi cuminda y pasa un dushi dia.
