Centro di Bario Noord ta organisando un tremendo Seso Sport

ORANJESTAD (AAN):  Riba dia 10 di juli 2026, Centro di Bario Noord (CBN) ta organisando su segundo edicion special di su gimnastiek pa cerebro, yama Seso Sport.

E actividad ta start for di 7.00 pm, cu registracion y 7:30 pm e Seso Sport mes lo ranca sali. CBN ta spera cu ciudadanonan, bisiñanan, amigonan y barionan por uni y forma ekipo di 5 persona y pasa un anochi ameno mientras ta prueba nan capacidad mental durante e anochi di preguntanan y puzzelnan desafiante y divertido.

Den cuadro di su mision pa promove desaroyo mental, social y fisico di poblacion di Noord, CBN ta ofrece e actividad aki como un manera accesibel pa mantene cerebro activo. E sessionnan ta consisti di un mescla di preguntanan di conocemento general, puzzelnan logico y weganan di memoria, den un ambiente agradabel y competitivo. Participantenan lo ser desafia pa traha hunto y ta test nan conocemento riba varios area.

"Cu Seso Sport, nos kier crea un luga unda hende no solamente por entrena nan cerebro, sino tambe ta pasa un momento agradabel hunto. Sea bo ta un pensado, un experto, bo ta un hoben, of simplemente bo kier pasa un nochi ameno y refresca bo memoria, tur tur hende ta bon bini. E ta un forma ideal pa keda vital y ta envolvi den bo comunidad," Aveline Figaroa, miembro di directiva CBN ta comparti.

E actividad ta destina pa hoben, adulto y mayornan di bario y bisindario, pero ta habri pa tur hende cu kier prueba su capasidad di pensa. Participacion ta costa Afl. 35 pa ekipo di 5 persona. E encuentro lo tuma luga na:

- Luga: Centro di Bario Noord

- Fecha: 10 di juli 2026

- Orario: Registracion: 7PM. SESO sport: 7:30pm

Cupo ta limita, asina registra bo grupo mas pronto posibel! Interesadonan y gruponan cu participa aña pasa, tur ta ser anima pa registra. Nos ta bay tin doorprizes y premio pa gruponan, por ehempel grupo ganado, grupo miho anima y grupo miho uniforma.