ORANJESTAD (AAN): Departamento Meteorologico Aruba ta pronostica un dia parcialmente nubla cu algun awacero breve,
principalmente durante marduga y mainta trempan. E temperatura maximo lo yega na 33 grado Celsius, cu un indice di calor entre 34 y 38 grado, mientras e minimo lo ta 26 grado.
Segun pronostico, un area di presion halto riba Oceano Atlantico lo sigui mantene un biento modera te fuerte riba Aruba. Ademas, un ola tropical cu ta move for di oost di Bonaire pa west lo trece mas humedad den region. Esaki por causa formacion di nubianan cu awacero y tin un posibilidad chikito di lamper y strena.
Meteo ta informa tambe cu un concentracion leve te modera di stof di Sahara lo pasa riba nos area durante e siguiente 24 ora. Esaki lo reduci visibilidad y por afecta calidad di aire. Personanan cu problemanan respiratorio ta wordo aconseha pa tuma e precaucionnan necesario.
Riba lama, condicionnan ta keda trankil na parti protegi di costa, pero na costanan oost te noordwest e lama lo ta modera te bastante bruto, cu olanan entre 7 y 8 pia. Un aviso pa boto chikito ta na vigor pa e costanan aki, y usuarionan di lama mester tene hopi cautela.
Pa e siguiente tres dianan, e pronostico ta indica un tempo parcialmente nubla cu un chance riba awacero durante ora nan di mainta. E biento lo sigui bini for di oost, modera te fuerte, cu rafaganan hopi duro de bes en cuando. E temperatura lo mantene rond di 33 grado como maximo y 26 grado como minimo.
