Centro di Bario Noord satisfecho cu recien workshop di Agricultura  

ORANJESTAD (AAN): Centro di Bario Noord a conmemora Dia Mundial di Agricultura y Alimentacion riba

diabierna, 16 di October 2026, cu un dia yen di enseñansa, participacion y concientisacion pa

muchanan, mayornan y adulto, cu enfasis riba e importancia di agricultura, alimentacion

saludabel y siguridad di alimento.

   E workshop a keda facilita pa Fundacion Alimentashon Escuela Kohehe y Sr. Hensley

Martina for di nos hermana isla Corsou.

   Durante mainta, muchanan a participa den un workshop interactivo di agricultura, unda nan a

haya oportunidad pa siña con pa planta, con mata ta crece y con pa cuida diferente tipo di

mata. E muchanan tabata sumamente entusiasma pa siña, y nan a mustra hopi interes durante

e demostracionnan y mientras nan tabata descubri e nombernan di e diferente matanan.

   Atardi, e actividadnan a sigui cu un workshop y dialogo pa mayornan y adulto. Sra. Jessica

Piña tambe a bin hunto cu un par di su clientenan di Stichting Ambiente Nobo pa

participa den e actividadnan. E presencia y participacion tabata demostra cu tin un interes

creciente pa compronde e importancia di agricultura y pa explora con nos por cuminsa planta

nos propio fruta y berdura na cas y den nos comunidad.

   Un di e puntonan importante cu a sali dilanti tabata e necesidad pa Aruba bira mas consciente y

prepara pa e futuro. Den un mundo cu ta cambia constantemente, nos no por tuma pa garantisa

cu e paisnan cu actualmente ta suministra nos cu fruta y berdura lo semper tin suficiente pa

cubri nan propio demanda y, ademas, continua exporta pa paisnan manera Aruba. P’esey, ta

importante pa nos busca manera pa fortalece nos propio produccion local y reduci, na unda ta

posibel, nos dependencia di alimento importa.

   E actividad aki a pone enfasis riba e importancia di educa nos muchanan desde un edad

tempran, mientras ta stimula mayornan y adulto pa tuma accion y reconoce cu cada hende por

contribui na un futuro mas sostenibel. Door di siña planta y produci nos propio alimento, nos por

promove un estilo di bida mas saludabel y fortalece e conciencia tocante siguridad di alimento

den nos comunidad.

   Centro di Bario Noord kier expresa su sincero gradicimento na Fundacion Alimentashon

Escuela Kohehe y Sr. Hensley Martina pa nan contribucion y cooperacion den e iniciativa

importante aki. Nan aporte a yuda amplia e conocimento y conciencia di nos muchanan y

comunidad tocante e importancia di alimento, agricultura y siguridad di alimento.

   Centro ta kere firmemente cu educacion y colaboracion comunitario ta esencial pa construi un

futuro mas fuerte. E simianan di conocimento cu nos planta awe por bira e cambio positivo cu

nos comunidad mester di dje mañan.