ORANJESTAD (AAN): E compania NV Elmar ta invita adultonan mayor interesa pa participa na e proximo edicion di Workshop Klik y Siña pa registra durante e proximo dianan di registracion.
Awe Diaranson 21 di October, registracion lo tuma luga di 3:30 pm te cu 5:30 pm na Centro di Bario Dakota.
Diahuebs 22 di October, registracion lo tuma luga di 3:30 pm te cu 5:30 pm na YMCA San Nicolas.
Personanan cu ta desea participa den e workshop mester registra personalmente na un di e localidadnan menciona durante e ora di registracion.
Workshop Klik y Siña ta un workshop totalmente gratis, specialmente prepara pa nos adultonan mayor, cu enseñansa practico pa yuda nan sinti nan mas sigur y independiente den e mundo digital. Durante e workshop, participantenan lo siña, entre otro, con pa uza computer, browse riba internet, uza e aplicacionnan digital di Elmar y con pa haci pago online.
E workshop na Centro di Bario Dakota lo cuminsa Diasabra 24 di October y lo tuma luga tur Diasabra durante 5 siman, di 10:00 am pa 12:00 pm.
Na YMCA San Nicolas, e workshop lo cuminsa Diasabra 24 di October y lo tuma luga tur Diasabra durante 5 siman, di 2:00 pm pa 4:00 pm.
Cu e iniciativa aki, NV Elmar ta sigui contribui na empoderamento digital di nos adultonan mayor, brindando nan oportunidad pa sigui siña, practica y familiarisa nan mes cu tecnologia den bida diario. Pa participa, registracion ta necesario.
