Centro di anti-corupcion di INTERPOL ta bay asisti Aruba

Minister Rocco Tjon:

ORANJESTAD (AAN)/NEW DELHI - Sr. Rory Corcoran ta e director di e centro nobo cu Interpol a lansa na januari di e aña aki. E meta di e centro ta pa combati crimen financiero y corupcion y ta pa provee un punto central globalmente pa duna asistencia na tur pais cu ta miembro di Interpol.

            Investigacion cientifico cu a wordo conduci na aña 2020 ta mustra cu 99 pais tawata victima di actonan coruptivo y crimen financiero. Calculonan ta mustra cu e diferente comunidadnan a perde alrededor di 42 biyon dollar na e criminalnan aki. Aruba no tawata un excepcion y nos tambe a bira victima di esaki.

            Interpol su centro di crimen financiero y anti-corupcion ta coopera y traha hunto cu Financial Action Task Force, the Egmont Group, Unidadnan Financiero Investigativo, Cuerponan Policial y sector financiero. E combinacion aki di experticio, informacion, tecnologia y metodonan investigativo ta su forsa.

            Aruba su delegacion a reuni cu sr. Corcoran cu ta e director di e centro aki,  y a reuni tambe cu sr. Stephen Kavanagh. Sr. Kavanagh ta responsabel pa Interpol su "Global Crime programmes" di "Cybercrime, Counter Terrorism, Organized and Emerging Crime".

            Ambos a indica cu nan ta bay yuda Aruba y otro luna lo tin un reunion cu Interpol y tur departamento Hudicial pa hunto cu Interpol yega na un "roadmap" cual lo wordo ehecuta otro aña.

            E centro aki lo bay enfoca riba asistencia investigativo, operacional y analitico, pero tambe asistencia di “capacity building”.  Minister di Husticia y Asuntonan Social Sr. Rocco Tjon a keda sumamente satisfecho cu e disponibilidad di parti di Interpol pa asisti Aruba den intentonan pa sigui combati crimen financiero y corupcion mas fuerte.