Inversionnan den turismo mester worde continuamente adapta
*E producto mester honra loke cada generacion ta busca
*No ta Gobierno local so ta dicidi riba economia y turismo
ORANJESTAD(AAN)—Ora papia di turismo, ta papia di un industria den cual e gobernacion di un pais no tin e gobernacion ni direccion absoluto.
Na cierto forma, e realidad aki ta conta pa un gran parti di comercio, cu durante Siglo 20 a conoce e formacion di conglomeracionnan y companianan multinacional, cu ta parti di e gobernacion comercial mundial y ta afecta Aruba tambe.
Den comercio e hende ta central, pasobra ta servicio di tur forma na e hende, ta habri posibilidad pa comercio, pa negoshi cu ta intercambio di servicio y producto pa un comunidad funciona.
Turismo ta parti di comercio internacional y a nace for di e necesidad di hende pa bandona su propio teritorio pa diferente motibo, cu te awe ta base di e diferente alanan cu tin den e comercio turistico mundial.
E prome turistanan cu a yega Aruba tabata Indjannan den nan barco. Algun mescos cu ta pasa awe, a dicidi di establece nan mes na Aruba.
Den tempo colonial, conkista cu tabata basa riba produccion comercial, a percura pa turista, mescos cu te awe negoshi internacional ta produci necesidad di biahe y ta produci turismo di hende cu pa nan trabou of negoshi, mester biaha.
Hasta malesa ta produci turismo, cu ta depende di Gobierno, di diferente sector comercial internacional, di trahador local y internacional cu den caso di turismo conoce sindicatonan special.
Na Aruba, un paraiso na mundo, turismo a wordo acopla na e resultado di e Epoca di Oro despues di guera cu a produci fortuna pa hopi hende a base di e negoshi pa reforma mundo.
Tempo a cambia y e hecho cu mas y mas ta mira necesidad pa percura pa e turista cu menos placa tambe por sinti su mes bon como turistia, ta duna prueba di esaki.
DIARIO siman pasa a adverti pa no haci e servicionan turistico demasiado caro.
No ta Gobierno so ta dicidi riba prijs. E prijs di producto ta depende di e prijs internacional di un producto, sigur na nos mundo di conglomeracion.
Companianan internacional ta pone nan prijsnan pa mayoria di producto cu Aruba ta importa y loke comercio di Aruba mester pa e por funciona.
Sigur pa loke ta trata turismo directamente, prijs internacional ta dicidi completamente riba prijs local, separa di loke Gobierno por aplica como medida na un pais.
Un negoshi mester traha placa pa e ta solido y un bon empresario tin ganashi den su empresa cu mester sigui biba.
E problemanan actual di Aruba mara directamente na e caracter di diferente forma di comercio cu ta uni na Aruba cu tin retonan nobo.
Mester conserva beneficio comercial di e compania Arubano cu ta sostene tur ramo di actividad comercial na Aruba contra actividad comercial cu ta produci lo minimo na e pais, na otro companianan y trahadornan di e pais.
Cada gremio tin e deber pa carga su responsabilidad enfrente su exponentenan pero tambe enfrente e comunidad total.
Turismo sigur mester wordo discuti na Aruba, na momento cu e tipo di turismo, manera pa basta tempo nos ta adverti, ta cambia cu e generacionnan nobo di turismo cu ta busca resultadonan diferente na e destinacion turistico.
Digitalisacion di servicio ta importante. Arubianismo ta sostene loke e generacion nobo tin como su prioridad como turista, cu ta acercamento na Pueblo, exploracion di pasado y retonan actual.
E generacion nobo kier productonan local, artesania local, marcanan local cu e por paga.
Riba su telefon e mester por haya presentacion di loke e ta busca pa medio di imagennan fotografico cu no ta presenta un Aruba yena cu edificionan y carateranan yena cu trafico, pero un Aruba cu ta invita pa explora su secretonan di e suelo, e hende, e Puenlo y su historia.
Turismo ta garantisa trabou pa Pueblo y entrada pa negoshi. Indudamente e hecho cu Aruba mester tuma medida financiero awor, ta fastioso. Pero sin e medidanan cu historia di mal gobernacion di Aruba a laga atras, Gobierno no por cumpli cu su deber pa percura pa e infrastructura di turismo y di comunidad mes.
Ta pasobra nos ta contra mas BBO, ta pasobra nos ta contra prijs mas halto, nos ta condena e motibonan graba den historia di Aruba, cu a condena e pais pa paga awe pa medida, cu ta afecta e turista tambe.
Awe si kier haci husticia cu Aruba, un Pueblo mester uni forsa, pa permiti turismo sigui funciona como uno di e motornan mas importante di Aruba den un cooperacion den cual Gobierno, Sindicalismo y Comercio ta duna lo miho di nan mes.
