Celebrando hubilo di Odetta Backer cu su 35 aniversario y Annoushka Koolman cu su 25 aniversario

ORANJESTAD (AAN): Siman pasa, Minister Maduro di Finansa y Cultura a ricibi señora Odetta Backer y señora Annoushka Koolman pa asina felicita y gradici pa nan respectivo 35 y 25 aniversario di trabao na bienestar di comunidad.

   Pa e ocasion festivo aki Minister Maduro a entrega na tur dos empleado publico nan decreto gubernamental corespondiente y tambe un regalo pa recorda e aniversario importante aki di trabao.

   E mandatario a hiba un discurso den cual el a gradici cada un dama cu ta celebrando un aniversario importante di nan trabao. E mandatario a conta un tiki di e trayectoria di cada empleado publico y a expresa su gratitud pa e trabao importante cu cada un ta haci na bienestar di nos comunidad.

   Señora Odetta ta trahando pa e ultimo 10 aña na Archivo Nacional Aruba na unda e ta yuda describi documentonan historico pa asina esaki nan por keda bon categorisa y conserva pa posterioridad. Ta un trabao di balor grandi cu generacion nos dilanti na nan tempo lo sa di gradici señora Odetta pa su tempo y dedicacion na su trabao.

   Señora Annoushka ta trahando na Departamento di Impuesto como cahera y den su funcion ta den contacto constante cu publico cu na hopi ocasion ta expresa nan elogio y gratitud pa su bon servicio. Di parti di directora di Departamento di Impuesto tambe señora Annoushka a ricibi un aprecio pa keda recorda su 25 aniversario di trabao.

   Minister Maduro ta felicita y gradici sra Odetta y señora Annoushka, y ta spera cu Gobierno por keda conta cu mas aña di nan servicio na bienestar di nos comunidad.