Directire Natuur en Milieu
ORANJESTAD (AAN): Directie Natuur en Milieu (DNM) a publica recientemente algun dato interesante tocante Warawara.
E warawara ta un di e parhanan jaagdo mas conoci na Aruba. Su nomber cientifico ta 𝘊𝘢𝘳𝘢𝘤𝘢𝘳𝘢 𝘱𝘭𝘢𝘯𝘤𝘶𝘴 of 𝘗𝘰𝘭𝘺𝘣𝘰𝘳𝘶𝘴 𝘱𝘭𝘢𝘯𝘤𝘶𝘴. E warawara tin un largura di entre 45 cu 61 centimeter. Ora e warawara adulto habri su halanan pa bula, si midi esaki di punta pa punta, e tin un 'wingspan' cu ta midi 1.25 meter hancho. E tin un peso di 850 pa 1500 gram. Su plumanan ta color shinishi te bruin scur cu parti di su cabes y nek blanco of crem. Su pecho, rabo y puntanan di su hala ta blanco cu preto. Riba su corona e tin un fronchi di pluma preto. Su cara ta oraño bibo cu un pik poco blanco. Su pianan ta largo color geel-oraño cu huñanan skerpi pa gara su presanan. No tin diferencia den apariencia entre ambos sexo di warawara.
Den temporada di reproduccion, por wak warawara macho ta bringa den e aire pa e embranan. E warawara ta haci un sonido di gritamento y hopi biaha e ta tira su cabes patras te casi riba su lomba. Despues di paar, e warawara ta traha un neishi di rama seco, taki fini cu pluma aden. Nan ta prefera traha nan neishi halto meymey di e brasanan di cadushi largo.
Normalmente warawara embra ta pone dos of tres webo. Despues di mas o menos 30 dia e webonan ta broei. E warawara chikito ta laga nan neishi pa prome biaha despues di ocho siman. E chikitonan ta haya di come for di nan mayornan y despues di algun siman, nan por destrui nan mesun presa.
E warawara ta alimenta principalmente cu carni di animalnan morto, bichi, pisca, y tin ora cuminda cu e ta horta for di otro parhanan. Nan ta defende nan mes door di bula bay. E enemigo di e warawara ta keda hende. Door cu hende ta uza mas tereno, e habitat di e warawara ta bira menos.
Fuente: Facebook Page di Directie Natuur en Milieu
