Celebrando e di 90 cumpleaño di Chemmy Kock

ORANJESTAD (AAN): Un cantidad di famia y amigo di Anselmo Kock a presenta Diadomingo merdia na Indian Rock Garden na Hooiberg, pa asina festeha su di 90 cumpleaño.

   Mihor conoci como Chemmy, e ta un di e ciudadanonan cu tabata hopi conoci antes trahando den Departamento di BUVO y Voorlichtingsdienst durante Gobierno di Antiyas.  Su experticio den fotografia y filmamento ta uno cu semper el a haya admiracion pe.

   Un fenomenal fiesta a ser prepara pa su casa Annie, hunto cu su yiu-, nieto-, demas famia cu a bin goza di un momento unico pa topa cu otro.

   E atardi a wordo bon anima pa e grupo J-Formation di Juan Ignacio, cu a pone hendenan constant riba pia pa goza di e celebracion fenomenal aki.

   E lugar tur na blauw decora, y publico a presenta cu e trahenan di mas deftig na honor di Chemmy.  E ta ricibi pabien ainda di su casa Annie Kock, su yiunan Alex Kock y famia, Riri Kock y famia, y Richelle Stuut-Kock y famia.