Nadia Dresscher di Facultad Arts & Science
ORANJESTAD (AAN): Diahuebs awor, e facultad di Hospitality and Tourism Management Studies (FHTMS) di Universidad di Aruba, lo tene un Anochi di Informacion encuanto nan programa pa educacion di Master’s.
Manera DIARIO a trece dilanti caba, esaki lo Diahuebs 28 di April 2022, for di 6:30 pm te cu 8:00 pm, na Universidad di Aruba mes.
Lo duna informacion di MBA di FHTMS, tambe MSc SISSTEM, tambe di MA Law, y di MA Governance & Leadership.
E facultad aki tin dos programa, esta uno di Bachelor’s y tambe awor presentando e programa di MBA. Diahuebs lo tin e anochi di Open House cu informacion di e MBA, cu ta Master’s in Business Administration.
E idea ta pa invita tur hende interesa di continua nan Master’s, y den e mesun invitacion aki e ta bay pa esnan trahando den diferente sector cu kier sigui cu e desaroyo di nan carera.
Pa e estudio di MBA, bo mester tin un Bachelor’s Degree y bo mester tin por lo menos dos aña di experiencia, riba un nivel di Supervisor of Management. Esey ta importante! Pues no ta djis un Bachelor’s Degree cu a caba di sali di Universidad, pero e parti di experiencia tambe ta importante, hunto cu e motivation letter. Esaki ta e di siete edicion di estudio di MBA na Universidad di Aruba.
Nadia Dresscher di Facultad di Arts & Science a indica cu nan tambe ta bay cuminza cu nan Master’s nobo, y pesey ta invita tur interesado pa bin busca informacion pa MA Governance & Leadership.
Nan Master’s ta special pa hendenan interesa cu ta traha den e sectornan priva y publico, y durante e Open House bo por check e curiculo y mira na kico bo por match pa e programa aki. Nan tambe ta escoge studiantenan a base di nan motivacion, nan historia academico, y lo match e criteria pa mira si bo por participa na MA Governance & Leadership.
“Si bo kier sigui studia, y a caba bo Bachelor’s, bo ta trahando den sector priva of publico, y bo tin hopi experiencia y bo kier keda up to date, e ora e Master’s aki ta special pa bo,” señora Dresscher a indica. Pesey e ta stimula tur hende pa acudi na e Open House aki, djis pa haya informacion y bo por papia riba tur loke ta posible den e programa di Master’s aki.
E estudio aki ta mik riba esnan cu ta den funcion di manager, ehecutivo, cu tin hopi aña di experiencia y cu hopi tempo pasa a ricibi un Bachelor’s, y bo tin di update bo mes cu tur loke tin aworaki, mirando cu mundo ta complica cu yen crisis, pues con pa goberna un compania of departamento, e ta net special pa haci bo conocemento mas amplio.
