ORANJESTAD (AAN): Mas dolor di cabez pa Narcotraficantenan. Pa awor nan lo mester a realiza cu henter e area di Lama Caribe ta cubri cu Marine Radar,
cu patruyahe di avion y tambe drones, pa asina detecta cualkier movimento sospechoso cu droga moviendo entre e paisnan.
Ministerio di Defensa Hulandes den fin di siman, a confirma cu e barco di marina Zr.Ms. Friesland den ultimo simannan a logra di intercepta un total di 1.900 kilo di droga. Na tres diferente ocasion, e barco aki a logra di intercepta e speedboatnan tipo Go-Fast. Esaki a bira e interceptacion number 5, number 6, y number 7 di droga pa e barco aki den dos luna di tempo, y e total e ora a bira 3.880 kilo di droga confisca.
E prome dos speedboat Go-Fast a wordo detecta door di un avion di patruyahe di Republica Dominicana, y tambe un avion di US Coast Guard. E di tercer Go-Fast a wordo descubri door di un avion di patruyahe di CBP Mericano, y mesora a activa e barco Zr.Ms. Friesland cu tabata den e area.
Esaki ta core baha nan speedboat special tipo FRISC, di cual abordo tin un team combina di marinero, tambe di US Coast Guard, y e Squadron Fleet Marine Hulandes, y rapidamente nan ta yega na e Go-Fast aki.
Den e prome di di dos captura, e tripulantenan di e Go-Fast a cuminza tira y benta tur droga for di nan speedboat ora cu nan a mira e FRISC ta yegando den nan direccion.
E recuperacion di tur pakete di droga cu a keda drief den lama, a bira un actividad unda henter e tripulantenan di e barco Friesland a bay duna un man, pa keda wak cu binocular unda tin pakete ta drief, y asina yega cerca pa piki nan for di lama, y marca cada uno.
Facilmente nan a coordina esaki y tabata saca e pakinan bek uno-pa-uno for di lama, y hunto cu e otro pakinan, tur a keda confisca. E tripulantenan di e 1er y 2ndo Go-Fast ta wordo deteni, y despues tur esaki ta wordo traspasa pa US Coast Guard. E tripulantenan y droga di 3er Go-Fast a wordo traspasa pa e barco di combate USS Billings di Merca pa nan wordo hiba dilanti Husticia na e pais.
Desde Januari 2022, e barco Zr.Ms. Friesland ta e stationschip di Caribe Hulandes cu ta activo den actonan anti-droga, y tambe ta duna sosten na Guaracosta di Caribe Hulandes. Den nan operacionnan te cu awor, ademas di 3.880 kilo di droga confisca, a yuda detene 21 miembro di tripulacion tambe haya ta haci e actonan ilegal aki riba lama.
